Forcat paraushtarake sudaneze rrethuan dhe bombarduan një spital në qendër të Khartoum të dielën, thanë pesë dëshmitarë okularë, ndërsa luftimet midis militantëve dhe ushtrisë së vendit morën afro 100 jetë gjatë fundjavës, shkruan Klix, përcjell Fol Drejt.
Udhëheqësit e palëve kundërshtare, udhëheqësi ushtarak sudanez Abdel Fattah al-Burhan dhe ish zëvendësi i tij dhe shefi paraushtarak Mohamed Hamdan Dagalo, kanë akuzuar njëri-tjetrin për nxitjen e luftimeve që kanë përfshirë vendin.
Burhan akuzoi Dagal për kryerjen e një “grusht shteti në tentativë dhe rebelim kundër shtetit”.
Dëshmitarët treguan ngjarjet tragjike nga Spitali Al-Moallem, ku bombardimet intensive detyruan stafin të evakuohej, duke lënë pas disa pacientë.
“Nuk kam asnjë dyshim se ata synuan spitalin me qëllim,” tha një mjek që evakuoi spitalin të dielën pasi Forcat e Mbështetjes së Shpejtë të Dagal (RSF) e granatuan atë.
Spitali ndodhet pak metra larg selisë së ushtrisë sudaneze dhe stafi mjekësor tha se aty po trajtohen një numër i madh i ushtarëve të plagosur dhe familjarëve të tyre. Materniteti i spitalit u godit nga granatimet, duke shkaktuar shembjen e murit.
Një fëmijë gjashtë vjeçar vdiq në ndërtesë, tha një mjek dhe dy fëmijë të tjerë u plagosën rëndë. Ndërsa granatimet u intensifikuan, mjekët dhe pacientët u mblodhën në korridor dhe u lutën.
“Në fillim u lutëm për shpëtim. Më pas kur granatimet u përkeqësuan, filluam të flisnim se cila do të ishte pjesa më pa dhimbje e trupit për të qëlluar dhe filluam të lutemi që të vdisnim pa dhimbje,” i tha CNN një nga punonjësit e spitalit.
“A mund ta besoni se ne lamë spitalin dhe lamë fëmijët në inkubatorë dhe pacientët e terapisë intensive pa staf mjekësor. Era e vdekjes ishte gjithandej,” tha një tjetër mjek.
Mjeku i tretë tha se brenda spitalit nuk kishte as rrymë e as ujë.
“Asnjë nga pajisjet tona nuk punonte… Gruaja që ishte me ne kishte një fëmijë dy ditësh, as nuk e di se çfarë i ndodhi,” tha ai. /FolDrejt/
