Ministri i Punëve të Brendshme, Xhelal Sveçla, ka falënderuar Parlamentin Evropian për vlerësimin e Kosovës si shtetin më demokratik në Ballkanin Perëndimor, shkruan Fol Drejt.
“Republika e Kosovës vlerësohet si shteti më demokratik në Ballkanin Perëndimor.
Falënderoj Parlamentin Evropian për miratimin e Raportit për Kosovën i cili vlerëson lartë arritjen e progresit demokratik të Kosovës. Në raportin e votuar sot, vlerësohet progresi i bërë në forcimin e demokracisë, luftën ndaj krimit të organizuar dhe sundimin e ligjit. Raporti vlerëson arritjet e jashtëzakonshme të Kosovës në sektorë të ndryshëm, veçanërisht në fushën e punëve të brendshme dhe migracionit, rritjen e operacioneve të suksesshme që synojnë luftimin e krimit të organizuar përmes bashkëpunimit ndërkombëtar dhe ndërkufitar.”, shkroi Sveçla në Facebook.
Sveçla theksoi se vlerësimet pozitive dhe sugjerimet konstruktive të ofruara në raport, do të shërbejnë si një udhëzues i vlefshëm për rritjen e mëtejme të demokracisë, sundimit të ligjit, luftimit të krimit të organizuar dhe niveleve të larta të korrupsionit si dhe krijimin e një administrate të bazuar në meritokraci.
Ai shtoi se institucionet vendore ndajnë shqetësimet e përbashkëta lidhur me situatën sfiduese në pjesën veriore të Kosovës, ku raporti rithekson se bandat kriminale në krye me Milan Radoicic dhe Zvonko Veselinovic, në lidhje të ngushta me Partinë Progresive të Serbisë, paraqesin kërcënim serioz për qytetarët. Ky fakt theksohet edhe në raportin e Serbisë, specifikisht për lidhjet e tyre me grupet kriminale që veprojnë në veri të vendit tonë.
“Ministria e Punëve të Brendshme dhe agjencitë vartëse të saj janë dhe do të vazhdojnë të jenë plotësisht të angazhuara për luftimin e këtyre elementeve kriminale dhe garantimin e sigurisë dhe mirëqenies së të gjithë qytetarëve. Do të zbatohen masa për adresimin e shpejtë dhe efektiv të kësaj çështje, në bashkëpunim me partnerët tanë ndërkombëtarë.”, tha tutje Sveçla.
Ministri në fund u shpreh se luftimi i korrupsionit të nivelit të lartë mbetet një çështje urgjente dhe ritheksoi vullnetin e fortë politik për të luftuar korrupsionin në të gjitha nivelet dhe pa dallim. Ashtu siç thekson edhe raporti, Sveçla tha se shpreson që edhe sistemi i drejtësisë të ndërmarrë veprimet e nevojshme në rritjen dhe zhvillimin e kapaciteteve të tyre që garantojnë rritje të efikasitetit dhe realizim të vullnetit të përbashkët. /FolDrejt/
