Ish-presidenti i Serbisë Boris Tadiq ka deklaruar sot se nuk e përjashton mundësinë që për “skandalin” në parlamentin republikan të kenë rënë dakord presidenti i SNS dhe Serbisë, Aleksandar Vuçiq dhe një pjesë e opozitës, shkruan Danas, përcjell Fol Drejt.
“Kjo është aq e çuditshme sa nuk e përjashtoj mundësinë që ky skandal në parlament të jetë planifikuar mes Vuçiqit dhe një pjese të opozitës, sepse për të dy performancat mediatike dhe vlerësimet personale janë mbi reputacionin dhe interesat e Serbisë, tha Tadiq në Twitter.
Ai akuzoi kryetarin e Kuvendit, Sllobodan Orliq, se ka akuzuar “paturpësisht” opozitën për sulme ndërsa “deputetët e SNS shajnë dhe kërcënojnë fizikisht deputetët e opozitës”.
Tadiq ka kujtuar se Vuçiq ditë më parë ka thënë se do të zbatojë parimet e propozimit franko-gjerman për zgjidhjen e çështjes së Kosovës.
“Vuçiq thotë se do ta pengojë hyrjen e Kosovës në Kombet e Bashkuara dhe ditë më parë tha se do të zbatojë parimet e marrëveshjes që mundëson hyrjen e Kosovës në OKB”. Dhe tani do t’i mbulonin të gjitha këto me këtë cirk, në mënyrë që në ditët në vijim, tema të ishte ‘ujku trim përballë banditëve frikacakë’”, theksoi Tadiq.
Sipas tij, skenat e sotme nga Kuvendi i Serbisë janë dëshmi se qeveria i ka shkatërruar themelet e shoqërisë dhe jo vetëm të institucioneve si Kuvendi.
“Sjellja e Presidentit të Serbisë, pjesës më të madhe të qeverisë dhe pjesës më të madhe të opozitës është skandaloze. Kjo është futja e gjithë shoqërisë në një sëmundje të rëndë”, tha Tadiq lidhur me incidentet në seancën e sotme të Kuvendit të Serbisë, temë e së cilës ishte Kosova. /FolDrejt/
