Ish-presidenti i Serbisë në dy mandate dhe kryetari i Partisë Socialdemokrate, Boris Tadiq, ka folur në lidhje me videon e Partisë Radikale Serbe, e cila cenon privatësinë e familjes së politikanes Rada Trajkoviq, në përpjekje për ta diskredituar atë dhe fëmijët e saj, shkruan Danas, përcjell Fol Drejt.
Tadiq tha se regjimi i Aleksandër Vuçiqit e ktheu Serbinë në kohën e bashkëpunëtorëve të Sheshelit nga të cilët u vra kryeministri i parë i Serbisë i zgjedhur në mënyrë demokratike, Zoran Gjingjiq.
Në video, radikalët thonë se po japin “informacione interesante për Aleksandra Trajkoviq Knap”, vajzës së Rada Trajkoviqit, duke u dhënë atyre ekskluzivitet të supozuar me shënimin se ato “nuk janë plotësisht të disponueshme për publikun”.
Radikalët shkruajnë se ku dyshohet se është e punësuar vajza e Trajkoviqit, e cila tashmë është vënë në shënjestër nga Shesheli dhe nga presidenti i Serbisë, Aleksandar Vuçiq, i cili e cilësoi atë, së fundmi këshilltare në Qeverinë e Kosovës, si “llumi më i keq serb”. Por radikalët vazhdojnë të japin informacione edhe për vajzën e saj të dytë, Biljanën dhe djalin Dejan, që përfliten edhe për lidhjet e tyre të pretenduara ndërkombëtare.
Regjimi i Vuçiqit na riktheu në kohën e njerëzve të Sheshelit ku u vra Zoran Gjingjiq. Pas vrasjes së Oliver Ivanoviqit, e njëjta metodologji e shënjestrim të kundërshtarëve politikë vazhdon. Së pari, pa asnjë sanksion, Shesheli praktikisht në media pro regjimit e ka lajmëruar vrasjen e Rada Trajkoviqit, ndërsa tani partia e tij ka në shënjestër direkte edhe fëmijët e saj”, deklaroi Tadiq.
Tadiq shton se gjatë gjithë viteve të kaluara ka paralajmëruar se ideologjia e Sheshelit është në pushtet në Serbi. Sipas Tadiqit, kjo ideologji është e përfaqësuar në qeveri më shumë se Vuçiqi apo ndonjë individ tjetër, të cilët, sipas tij, janë vetëm pasues të asaj “ideologjie monstruoze”.
Qytetarët duhet ta kuptojnë se ajo që po i bëhet Rada Trajkoviqit dhe familjes së saj po u bëhet të gjithë qytetarëve të Serbisë, sepse regjimi që e kryen këtë torturë është regjimi që udhëheq jetën e të gjithë qytetarëve. Këtu nuk bëhet fjalë për luftë politike, por për qytetërim, prandaj duhet ta kundërshtojmë këtë çmenduri të gjithë së bashku dhe me të gjitha mjetet. Në një vend ku institucionet janë të okupuara, jeta dhe siguria e disidentëve të regjimit duhet të mbrohet nga publiku dhe për këtë arsye është e rëndësishme që të gjithë të ngremë zërin tonë, tha Tadiq. /Danas/
