Deputeti i AAK-së, Besnik Tahiri, ka thënë se Kosova është më së keqi në rajon me mesataren e pagave, gjë e cila sipas tij rrezikon ikje masive të punëtorëve, raporton Fol Drejt.
Tahiri tha se vendet e Ballkanit Perëndimor kanë nisur të marrin masa të shpejta, për t’u përballur me zhvillimet që po prodhohen nga ikja e punëtorëve. Në Kuvendin e Republikës së Shqipërisë, po diskutohet për rritjen e pagës mesatare në 900 euro deri në prillin e vitit 2024.
“· Lëvizje të ngjashme kanë marrë edhe vendet tjera të rajonit. Në krahasim me vitin 2015, kur Kosova kishte pagën mesatare 444 euro, Maqedonia e Veriut – 504 euro, Serbia – 537 euro, Mali i Zi – 726 euro dhe Shqipëria 259 euro;
· Aktualisht, paga mesatare në rajon është: Kosova 504 euro, apo rritje prej 60 euro; Maqedonia e Veriut, 705 euro apo rritje prej 201 euro; Serbia – 763 euro, apo 226 euro, Mali i Zi – 792 euro apo 66 euro dhe Shqipëria – 900 euro, apo 641 euro.”, shkroi Tahiri në Facebook.
Tahiri theksoi se përderisa këta numra tregojnë për rritjen e pagës mesatare në rajon, Qeveria e Kosovës dhe Ministri Murati, përveç koeficientit të përcaktuar 105 euro, nuk ka ndërmarrë asnjë masë.
Ai tha se me urgjencë duhet të shqyrtohet rritja e koeficientit në 129 euro në administratë publike siç ka propozuar AAK dhe të merren masa të shpejta për pagën minimale sipas amandamentit që AAK e ka propozuar në Komisionin për Buxhet.
“Në rast se ne presim, e që liberalizimi po ndodhë në një periudhë kur vendet evropiane, në veçanti Gjermania, ka rritur kontingjentin nga Ballkani Perëndimor, rrezikojmë që vitet pasuese të jenë goditje e rëndë për ekonominë tonë, në veçanti për punëtorët.
Veproni mos fleni se shkuam poshtë!”, u shpreh në fund Tahiri. /FolDrejt/
