Presidenti i Serbisë, Aleksandar Vuçiq, ka thënë se ballafaqimi i sotëm ndërmjet dy delegacioneve të Beogradit dhe Prishtinës në Bruksel përfundoi pa ndonjë rezultat, pasi Kryeministri i Kosovës Albin Kurti, nuk e pranoi propozimin e kompromisit të Bashkimit Evropian, shkruan N1info, transmeton Fol Drejt.
“Ne patëm bisedime dhe mendoj se ato përfunduan pa sukses në drejtim të gjetjes së një rruge të qartë drejt normalizimit të marrëdhënieve. Të gjithë kemi propozimet tona, në fund ne si Serbi e pranuam propozimin e kompromisit të Bashkimit Evropian. Kurti nuk ka dashur ta pranojë dhe takimi ka përfunduar”, ka thënë Vuçiq.
Sipas presidentit, gjatë bisedimeve ka pasur kryesisht situata të pakëndshme.
“Është logjike që të gjithë po luftojnë për të vetën. Është e qartë se Kurti po i shmanget formimit të një bashkësie të komunave serbe”, shtoi Vuçiq.
Ai shtoi se Serbia nuk po ikën nga obligimet e saj dhe se si Serbia ashtu edhe BE-ja janë shprehur qartë rreth asaj se si duhet të vazhdojnë gjërat.
“Dhe ne e pranuam një propozim të tillë të tyre, përkundër faktit se nuk është aspak e lehtë për ne dhe Kurti refuzoi”, tha Vuçiq.
Sipas fjalëve të tij, propozimi nënkuptonte se fillimisht duhet të diskutohet Asociacioni dhe nëse ka një proces të besueshëm në formimin e tij apo jo.
“Nëse do të konstatonim se ai është i besueshëm, do të fillonim të punonim paralelisht me obligimet tona. Megjithatë, pala tjetër nuk e pranoi”, përsëriti presidenti.
Ai shpjegoi se propozimi evropian nënkupton procedimin paralel.
“Ata e dinë se Asociacioni, apo komuniteti i komunave serbe, duhet të shkojnë së pari. Përfundimi është se ata nuk duan. Kur e pyet Kurtin se a dëshiron ta pranosh formimin e Asociacionit, asnjëherë nuk merr përgjigje pozitive”, tha Vuçiq.
Ai theksoi se refuzimi për të arritur një marrëveshje vetëm e çon Serbinë në probleme më të mëdha.
“Shpresoj se në të ardhmen do të gjejmë disa zgjidhje, sepse në këtë mënyrë nuk po shkojmë vetëm në qorrsokak, por në diçka që nuk dihet”, tha Vuçiq.
Sipas Vuçiq, në takim u diskutua edhe për gjendjen në veri të Kosovës, ku janë ngritur çështje si ajo e shpronësimeve të paligjshme, emigrimit të serbëve nga institucionet e Kosovës dhe vendet ku ata punojnë./FolDrejt/
