Talenti nga Drobeshi i Vitisë, Drinor Hajdini, pritet të jetë e ardhmja e futbollit nga Juglindja e Kosovës. Aktualisht golashënuesi i spikatur luan për grupomoshat U-15 për klubin Galaksia në Lidhjen Rajonale të Futbollit të Gjilanit (LRFGJ).
Në 14 takime të zhvilluara me fanellën e Galaksisë në LRFGJ për sezonën 2021/2022, ka arritur të realizoj 40 gola. Kjo shifër tregon se bëhet fjalë për një talent që premton shumë. Përkthyer në gola të shënuar për lojë, i bie që mesatarisht talenti vitias ka shënuar tri gola për secilin takim.
Me 40 golat e shënuara me Galaksinë, Hajdini ka arritur të triumfoj për çmimin e golashënuesit më të mirë në garat e U-15 në Lidhjen Rajonale Futbollistike të Gjilanit në kuadër të Federatës së Futbollit të Kosovës (FFK).
Super golashënuesi luan si sulmues qendror me të dyja këmbët, mirëpo e djathta është e preferuar për të. Aktualisht e mbanë numrin 15 në fanellë dhe pritet që edhe vitin e ardhshëm të jetë pjesë e Galaksisë. Sulmuesi nga Galaksia shprehet i lumtur me paraqitjet e tij sezonën e kaluar. “Atmosfera në klub është shumë e mirë dhe lojtarët më mbështesin shumë. Edhe me trajnerët kaloj shumë mirë. Sezonën e kaluar isha i kënaqur me paraqitjet sepse arrita të realizoj 40 gola për ekipën”, shprehet Hajdini.
Drinogoli nga Drobeshi ëndërron që një ditë të shënoj gola në stadiumet e skuadrave të mëdha të futbollit europian. “Jam tu punu shumë. Ushtroj edhe individualisht edhe me ekipën. Shpresoj e ëndërroj që një ditë të jem pjesë e ndonjë klubi të madh europian”, thotë talenti kosovar. Ai e pëlqen Kylian Mbappen e PSG-së (Paris Saint-Germain) dhe sulmuesin e Barcelonës, Robert Lewandowski.
Karrierën me futboll e ka filluar nga mosha 8-vjeçare me klubin KF Vitia nën drejtimin e trajnerit Sylejman Hajdini, ndërsa vitin e kaluar është transferuar tek Galaksia nën drejtimin e trajnerit, Jetulla Arifi./Gëzim Olluri/FolDrejt/
