Kryesia e Kuvendit të Kosovës, pas mbledhjes së rregullt të cilën e ka mbajtur sot, ka vendosur që seanca e re e kuvendit të mbahet të enjten, më 19 maj, me fillim nga ora dhjetë, transmeton Fol Drejt.
Mimoza Kusari Lila, shefe e grupit parlamentar të Vetëvendosjes, tregoi se cilat do të jenë pikat e rregullta të rendit të ditës.
Sipas saj, miratimi në lexim të dytë të projektligjit për turzimi dhe shqyrtimi i projektligjit për policinë ushtarake në Forcën e Sigurisë së Kosovës, pritet të jenë pikat kyçe të kësaj seance.
“Kemi diskutuar edhe për konstituimin e ekipit për reformën zgjedhore, ku në mbledhjen e radhës do t’i kemi emrat e anëtarëve që do të marrin pjesë në reformën zgjedhore… Një fakt i pakontestueshëm është që Kosova ka hyrë në një proces stabil të zgjedhjeve që edhe në nivel lokal e qendror kanë qenë shembull për rajonin”, u shpreh Kusari.
Ndërkaq, nga opozita janë ankuar se edhe kësaj radhe nuk do të shtrohet për diskutim çështja e tërheqjes së mjeteve nga Trusti./FolDrejt/