Një ditë e ngjeshur me aktivitete është karakterizuar sot në Ohër. Takimi ndërmjet Kryeministrit të Republikës së Kosovës Albin Kurti dhe Presidentit të Serbisë Aleksandër Vuçiq, bashkë me palën ndërmjetësuese – Bashkimin Evropian, përkatësisht përfaqësuesit Josep Borrel dhe Miroslav Lajçak, po pritet me vëmendje të shtuar, shkruan Fol Drejt.
Fillimisht Kryeministri Kurti ka takuar Zëvendësndihmës Sekretarin e Shteteve të Bashkuara për Çështje Evropiane dhe Euroaziatike dhe njëherësh të dërguarin e posaçëm të Shteteve të Bashkuara të Amerikës për Ballkanin Perëndimor, Gabriel Escobar; por edhe Shefin e Politikës së Jashtme të Bashkimit Evropian, Josep Borrell dhe të dërguarit të BE-së për dialogun, Miroslav Lajçak.
Këto takime të ndara i kanë paraprirë takimit trilateral ndërmjet Kurtit, Vuçiqit dhe përfaqësuesve të BE-së.
Agjendë të ngjashme ka pasur edhe Vuçiq.
Kreu i politikës së jashtme të BE-së, Josep Borel dhe i dërguari i BE-së për dialogun ndërmjet Kosovës dhe Serbisë, Miroslav Lajçak, sot në mëngjes fillimisht janë takuar me presidentin e Serbisë, Aleksandar Vuçiq.
Ndërmjet këtyre takimeve ka pasur pak deklarata, ndërsa takimi është duke u cilësuar si historik.
Sekretari i NATO-s, Jens Stoltenberg ka thënë sot se “bisedimet e ndërmjetësuara nga BE në Ohër janë të rëndësishme dhe pres që presidenti i Serbisë, Aleksandar Vuçiq dhe kryeministri Albin Kurti të angazhohen në mënyrë konstruktive dhe të bëjnë përparim”.
Ambasadori i Mbretërisë së Bashkuar në Kosovë, Nicholas Abbott ka thënë sot se “një rezultat pozitiv nga bisedimet e Ohrit për normalizimin e marrëdhënieve Kosovë-Serbi mund të ndodhë me vullnet politik, guxim dhe pragmatizëm nga kryeministri Albin Kurti dhe presidenti i Serbisë, Aleksandar Vuçiq.”
Deklarata të tilla shpresëdhënëse janë dhënë edhe nga zyrtarë të tjerë të rëndësishëm politikë vendor, rajonal dhe botëror.
Megjithatë, palët, pritet t’i përqendrojnë energjitë te një pajtim de facto, por jo edhe de jure. Me një fjalë, nga shumë njohës politik në vend dhe jo vetëm, nuk pritet as kësaj radhe që të nënshkruhet dokumenti i marrëveshjes./FolDrejt/
