Gabriel Escobar ka takuar gjatë të hënës krerët më të lartë të republikës, ndërsa në fokus të bisedës ka qenë gjendja e tensionuar në veri, shkruan Fol Drejt.
I dërguari i Shteteve të Bashkuara të Amerikës për Ballkanin takoi Presidenten Vjosa Osmani dhe Kryeministrin Albin Kurti.
Pritej që këtë të hënë për vizitë të vinte Këshilltari i Lartë i Departamentit të Shtetit – Derek Chollet, por vizita e tij u anulua, shkaku që ishte infektuar me COVID-19.
Escobar ka takuar edhe krerët e Listës Serbe. Mediat nga Beogradi nuk zbulojnë shumë në lidhje me këtë takim, përveç theksit mbi tematikën, e cila për fokus kishte situatën në veri.
“Në takim është diskutuar për zhvillimet e fundit në vend dhe në rajon. Presidentja Osmani ka theksuar nevojën urgjente të heqjes së barrikadave në veri të vendit të vendosura nga strukturat ilegale të organizuara në banda kriminale dhe të dirigjuara nga Vuçiqi. Ajo potencoi se sulmet ndaj institucioneve të Republikës së Kosovës dhe atyre ndërkombëtare janë krime për të cilat autorët e këtyre sulmeve duhet të përballen urgjentisht me drejtësinë” – u tha në një komunikatë të lëshuar nga Zyra e Presidentes.
Nga Zyra e Kryeministrit u bë e ditur se në takim “u diskutua për situatën aktuale dhe zhvillimet e fundit, veçanërisht në pjesën veriore të Republikë së Kosovës. U theksua se barrikadat në rrugë duhet të largohen menjëherë”.
Vetë Escobar nuk ka dhënë ndonjë deklaratë.
Veriu, ndërkaq, mbetet i tensionuar, me prani të shtuar të policëve. Sipas mediave serbe polici serb i arrestuar Dejan Pantiq i ka mohuar të gjitha akuzat, duke u deklaruar si i pafajshëm. Pantiq, është arrestuar të shtunën nën dyshimin se ka organizuar sulmin ndaj zyrave të Komisioneve Komunale Zgjedhore. Pas arrestimit të tij, grupe të serbëve, në shenjë revolte, kanë ngritur barrikada.
Në anën tjetër një grup qytetarësh nga Mitrovica, kanë kërkuar “të asgjësohen bandat kriminale”, në mënyrë “për t’i lënë të lirë/a dhe të sigurt/a qytetarët/et e Republikës së Kosovës!”
Ky grup qytetarësh nëpërmjet një deklarate, ka dënuar dhunën dhe ka kërkuar nga organet e rendit që t’i asgjësojë ato. Për më shumë, shihni deklaratën e plotë:
DEKLARATË E PËRBASHKËT:
Të asgjësohen bandat kriminale në Veri për t’i lënë të lirë/a dhe të sigurtë/a qytetarët/et e Republikës së Kosovës!
Dhuna e shkaktuar së fundmi nga bandat kriminale në Veri vë në pikëpyetje ndërtimin e një shoqërie të mirëfilltë politike.
Terrorizimi i qytetarëve/eve dhe bllokimi i lëvizjes së lirë kërcënon vlerat e përbashkëta që shteti i Kosovës i garanton për të gjithë, pa asnjë dallim etnik, fetar dhe kulturor.
Te gjithë qytetarët/et e Republikës së Kosovës duhet t’i gëzojnë të drejtat që garantohen me Kushtetutë dhe me ligjet në fuqi.
Vullneti dhe e ardhmja e tyre nuk duhet të diktohen nga grupet kriminale.
Mbështetësit e kësaj deklarate:
Besart Peci
Mevlude Skuroshi
Enis Emini
Genti Behramaj
Valent Ibishi
Qendresë Beqiri
Berna Ramaxhiku
Fatlum Sadiku
Liridon Kurti
Drilon Cena
Armela Hajra
Fehmi Ferati
/FolDrejt/
