Të paktën 78 persona janë vrarë dhe qindra të tjerë janë plagosur në një rrëmujë në kryeqytetin e Jemenit, sipas zyrtarëve dhe mediave Houthi, raporton Al Jazeera, përcjell Fol Drejt.
Rrëmuja ndodhi vonë të mërkurën, ndërsa qindra njerëz u grumbulluan në një shkollë në Sanaa me shpresën për të marrë një donacion bamirësie prej rreth 10 dollarësh që po shpërndahej nga tregtarët për të shënuar ditët e fundit të Ramazanit.
Dëshmitarët Abdel-Rahman Ahmed dhe Yahia Mohsen i thanë agjencisë së lajmeve Associated Press se Houthi të armatosur kishin qëlluar në ajër në një përpjekje për të kontrolluar turmën, duke goditur me sa duket telat elektrikë, të cilët shpërthyen dhe shkaktuan panik tek ata që prisnin.
Pamjet e transmetuara nga kanali televiziv Al Masirah i Houthis treguan njerëz që ngjiteshin mbi njëri-tjetrin për të provuar të kalonin rrugën.
Shumë prej tyre kishin gojët e mbuluara nga duart e njerëzve të tjerë, pjesa tjetër e trupave të tyre u përfshi nga turma e dendur, treguan pamjet.
Foto të veçanta të publikuara nga Houthis, të cilët kontrollojnë kryeqytetin, tregonin njolla gjaku, këpucë dhe veshje të viktimave të shpërndara në tokë me hetuesit që ekzaminonin zonën.
Më shumë se 300 njerëz u lënduan, raportoi agjencia e lajmeve AFP, duke cituar një zyrtar të sigurisë Houthi. Të paktën 73 nga të plagosurit u dërguan në spitalin al-Thowra në Sanaa, sipas zëvendësdrejtorit të spitalit Hamdan Bagheri, me familjet që nxituan në spitale për të gjetur të dashurit e tyre.
Mohammed Al Attab i Al Jazeera, i cili ndodhet në Sanaa, tha se katastrofa kishte “ngjallur zemërim mbarëkombëtar”.
Zëdhënësi i Ministrisë së Brendshme të kontrolluar nga Houthi, Brig Abdel-Khaleq al-Aghri e përshkroi incidentin si “tragjik” duke fajësuar “shpërndarjen e rastësishme” të fondeve pa koordinim me autoritetet lokale.
Dy tregtarët që organizuan ngjarjen janë arrestuar dhe një hetim është duke u zhvilluar, tha ministria. Houthis njoftuan se do të paguanin rreth 2,000 dollarë si kompensim për secilën familje që humbi një të afërm, ndërsa të plagosurit do të merrnin rreth 400 dollarë.
Sanaa ka qenë nën kontrollin e Houthis që nga viti 2014 kur ata hoqën qeverinë e njohur ndërkombëtarisht të vendit.
Kjo çoi në ndërhyrjen e një koalicioni të udhëhequr nga Arabia Saudite një vit më vonë.
Më shumë se 150,000 njerëz, përfshirë luftëtarë dhe civilë, janë vrarë në konfliktin, i cili ka krijuar një nga fatkeqësitë më të rënda humanitare në botë.
Më shumë se 21 milionë njerëz në Jemen, ose dy të tretat e popullsisë së vendit, kanë nevojë për ndihmë dhe mbrojtje, sipas Zyrës së Kombeve të Bashkuara për Koordinimin e Çështjeve Humanitare. /FolDrejt/
