Dhuna ka shpërthyer në qendër të Parisit pas sulmit vdekjeprurës të së premtes ndaj komunitetit kurd të qytetit.
Protestuesit përmbysën makina, duke u vënë flakën disave dhe hodhën objekte ndaj policisë. Oficerët u përgjigjën duke hedhur gaz lotsjellës, shkruan BBC, përcjell Fol Drejt.
Tre persona u vranë në sulmin e së premtes, i cili ndodhi në një qendër kulturore kurde dhe një restorant.
I dyshuari mashkull i bardhë 69-vjeçar tha më pas se ai ishte një racist që urrente të huajt, tha një burim policor për AFP.
E njëjta agjenci e lajmeve u tha se burri nisi sulmin e tij me një pistoletë “shumë të përdorur” dhe iu gjet një kuti me të paktën 25 fishekë dhe “dy ose tre” karikatorë të mbushur.
Trazirat filluan menjëherë pas të shtënave. Pamjet treguan njerëz duke ndezur zjarre në mes të rrugës dhe duke thyer xhamat e makinave.
Policia përdori gaz lotsjellës ndërsa protestuesit u përpoqën të çanin kordonin e sigurisë.
Dhuna e ripërtërirë e së shtunës u shpalos pasi qindra kurdë u mblodhën paqësisht në Place de la Republique për të nderuar tre viktimat.
Policia vazhdon të marrë në pyetje burrin, një shofer treni në pension. Ai po mbahet nën dyshimin për vrasje dhe tentativë vrasjeje dhe tani përballet edhe me akuzën shtesë të veprimit me motiv racist.
Ai ka një histori të shkeljeve të armëve dhe ka dalë se është liruar me kusht vetëm disa ditë para sulmit.
Vitin e kaluar, ai u akuzua për dhunë raciste për një sulm me shpatë në një kamp migrantësh diku tjetër në kryeqytetin francez.
Dëshmitarët e të shtënave të së premtes në lagjen e 10-të të qytetit thanë se sulmuesi – i gjatë, i bardhë dhe i moshuar – qëlloi për vdekje dy burra dhe një grua.
Tre të tjerë kanë mbetur të plagosur, njëri prej të cilëve ndodhet në gjendje kritike për jetën.
Tre vende u vunë nën zjarr – qendra kurde Ahmet-Kaya, si dhe një restorant aty pranë dhe një parukeri – përpara se i dyshuari të arrestohej pa luftë.
Kurdët kanë bërë thirrje për mbrojtje më të mirë nga autoritetet franceze ndërsa udhëheqësit e komunitetit takuan shefin e policisë pariziane të shtunën.
Të shtënat e së premtes erdhën pothuajse 10 vjet pas vrasjes së tre aktivisteve kurde në kryeqytetin francez – një krim i pazgjidhur.
Komuniteti kishte përsëri “frikë”, pasi ishte “traumatizuar” nga vrasjet e janarit 2013, tha një avokat i këshillit demokratik kurd në Francë (CDK-F)./FolDrejt/
