Mbrëmë rreth orës 23 në Zveçan, disa pjesëtarë të Policisë së Kosovës janë sulmuar me armë zjarri nga disa persona të armatosur, ku për rrjedhojë është plagosur njëri prej zyrtarëve. Megjithatë, sot situata raportohet të jetë e qetë, shkruan Fol Drejt.
“Sot me datë 08.12.2022, rreth orës 23:00, në fshatin Serbovc, Komuna e Zveçanit, Njësitet policore deri sa kanë qenë në detyra të rregullta, në patrullim, janë sulmuar nga persona të armatosur me armë të gjata, nga një automjet i tipit Audi, ngjyrë hiri, me targa KM.
Si pasoj e incidentit, një pjesëtarë i Policisë së Kosovës është lënduar lehtë dhe janë shkaktuar dëme të konsiderueshme materiale në veturën e policisë.
Njësitet relevante policore kanë dalë në vendngjarje, për të kryer hetimet, kurse zyrtari policor i lënduar është transportuar në QKMF për ofrimin e ndihmës mjekësore” – raportoi mbrëmë Policia e Kosovës.
Sot, në një intervistë për N1info, nënkryetari i Listës Serbe Igor Simiq, deklaroi se nga mëngjesi i sotëm situata në pjesën veriore të Mitrovicës është “e qetë, por e tensionuar”.
“Një natë tjetër pa gjumë është pas nesh për shkak të përpjekjes së Prishtinës për të pushtuar veriun e Kosovës. Dikujt nga jashtë mund t’i duket se situata është normale që nga mëngjesi, por këtu po zien”, tha Simiq.
Beogradi vazhdimisht e ka akuzuar Prishtinën zyrtare si “fajtoren” e vetme për rëndimin e gjendjes, mirëpo gjërat u përkeqësuan qyshkur Lista Serbe vendosi t’i braktiste institucionet e Kosovës, si shenjë revolte shkaku i zbatimit të një marrëveshjeje për targat që Serbia dhe Kosova ishin zotuar ta jetësonin para shumë vitesh.
“Plani i Albin Kurtit është i qartë, për të bërë presion të tillë mbi serbët që ata të tërhiqen nga këto zona”, tha Simiq.
Megjithatë kundër pretendimeve të Listës Serbe, kanë dalë edhe disa politikanë serbë. Politikanja Rada Trajkoviq ka shkëmbyer replika me vetë presidentin e Serbisë Aleksandër Vuçiq, të cilin e ka cilësuar si fajtorin kryesor për vrasjen e Oliver Ivanoviqit. Nga ana tjetër Vuçiq ka thënë për Trajkoviqin dhe për serbët e tjerë që janë të një mendjeje me të, “se Kurti po i nxjerr nga fundi i kades”.
Policia e Kosovës rriti praninë e trupave të saj në komunat veriore ditëve të fundit.
Ndërsa gjatë gjithë kësaj jave, veriu i vendit u përball me sulme të vazhdueshme nga persona ende të panjohur dhe të gjitha këto para mbajtjes së zgjedhjeve të jashtëzakonshme në katër komunat veriore me shumicë serbe, që pritet të mbahen fundjavën e ardhshme./FolDrejt/
