Policia e Kosovës ka njoftuar se në Ferizja ka pasur një rast të vetëvrasjes në tentativë, qpër fat të mirë personi ka shpëtuar, shkruan Fol Drejt.
“Dje, rreth ores 13:03 Policia Rajonale e Ferizajt ka pranuar një informatë se një person mashkull, kosovar i moshes 62 vjeçar, kishte hipur mbi një vinç të lartë rreth 40 metra, afër një objekti banesorë në ndërtim në rrugën ’’Ahmet Kaciku’’ në Ferizaj dhe po tentonte të vetvritej. Menjëherë në vendin e ngjarjes kanë dalë ekipe të policisë nga njësia reaguese dhe njësia e hetimeve së bashku me mbikëqyrësin e ndërrimit të stacionit të policisë në Ferizaj.”, shkruan në raportin policor.
Në njoftim thuhet se njëkohësisht janë njoftuar edhe ekipe mjekësore nga Qendra Emergjente, si dhe Brigada Zjarrfiksëve të Ferizajt, të cilët edhe ata kanë dalë në vendin e ngjarjes.
Tutje, policia theksoi se janë marrë të gjitha masat e nevojshme për shpëtim nga ekipet në vendin e ngjarjes, është bllokuar për qarkullim rruga “Ahmet Kaçiku” dhe menjëherë mbikëqyrësi i ndërrimit ka filluar të negociojë me viktimin dhe ta bindë atë, që mos të kërcejë nga lartësia. Pas shumë përpjekjesh nga mbikëqyrësi i ndërrimit, Toger R.H, në ora 13:50 viktima është bindur dhe ka lejuar që të shpëtohet dhe të zbresë nga vinçi në tokë pa asnjë lëndim.
Në fund të komunikatës thuhet se policia e ka shoqëruar viktimën për në stacionin e policisë në Ferizaj dhe nën autorizim të prokurorit kujdestar nga Prokuroria Themelore në Ferizaj, rasti është cilësuar ” Vetëvrasje në tentativë”, ndërsa policia po vazhdon hetimet. /FolDrejt/
