Nesër në komisionin për Buxhet, Punë dhe Transfere do të diskutohet për tërheqjen e 30 përqindëshit nga Trusti, shkruan Fol Drejt.
Këtë e ka konfirmuar për Klankosova.tv njëri nga inicuesit e peticionit për tërheqjen e parave nga Trusti, Adnan Jashari.
Jashari tha se edhe ai është thirrur në komisionin dhe se do të ofrojë fakte pro tërheqjes së 30 përqindëshit nga Trusti.
Poashtu, ai u bëri thirrje deputetëve që ta votojnë këtë nismë.
“Nesër do të diskutohet në Komisionin Parlamentar për Buxhet, Punë dhe Transfere! Në cilësinë e iniciuesit të Nismës Legjislative jam i ftuar nesër të marr pjesë në mbledhjen e Komisionit Parlamentar” – tha Jashari.
“Do të ju bëj thirrje nesër edhe komisionit parlamentar edhe deputetëve të Kuvendit të Republikës së Kosovës të votojnë pro, do t’i tregoj argumentet, arsyet dhe domosdoshmërinë që projektligji që lejon tërheqjen e një pjesë të kursimeve nga Trusti të votohet pro!”, shtoi ai.
Kujtojmë se, në mesin e këtij viti, nisma për tërheqjen e 30 përqindëshit nga Trusti nuk kishte kaluar, dhe tani po synohet sërish që një gjë e tillë të jetësohet. /FolDrejt.
