Ndodhemi në ditët e fundit të muajit shtator, ndërsa viti i ri shkollor në Kosovë ende nuk ka filluar. Shkak është bërë greva e mësimdhënësve, ndërsa gjasat që ngërçi i krijuar të tejkalohet, janë të vogla, shkruan Fol Drejt.
Propozimi i Ardian Golës, i dhënë ditë më parë në adresë të Sindikatës së Bashkuar të Arsimit, Shkencës dhe Kulturës (SBAShK), që kjo e fundit t’i ndryshojë format e presionit karshi qeverisë, ndonëse u shqyrtua, nuk dha rezultate.
Më konkretisht Gola, deputet nga radhët e Lëvizjes Vetëvendosje, njëherësh kryetar i Komisionit për Arsim, Shkencë, Teknologji, Inovacion, Kulturë, Rini dhe Sport, propozoi që metoda aktuale e grevës të zëvendësohet me atë të mosdhënies së notave për nxënësit.
“Mund të jetë një mjet i efektshëm si presion sindikal ndaj qeverisë”, e pat argumentuar propozimin e tij deputeti Gola, duke i siguruar sindikalistët që nuk do t’iu mungojë përkrahja e deputetëve.
Këtë propozim Gola e dha në mbledhjen e Komisionit për Arsim, ku të ftuar ishin edhe krerët e SBAShK-ut.
“Të jeni të bindur që do të jemi prapa jush”, ka thënë Gola, i cili është edhe kryetar i këtij komisioni.
Por nga këshilli grevist, megjithëse u vlerësua kjo përpjekje, propozimi u hodh poshtë, pas një diskutimi të gjatë me anëtarët e SBAShK-ut.
“Ka qenë një takim me kryetarët e sindikatave komunale bashkë me kryetarin e Komisionit për Arsim, Ardian Golën dhe disa nga anëtarët e Komisionit” – kanë thënë nga SBAShK-u, duke shtuar në fund, që diskutimi nuk ka dhënë rezultate, meqë shumica kanë qenë kundër këtij propozimi.
Nga ana tjetër, propozimi i deputetes opozitare Hykmete Bajrami, duket se nuk ka lënë përshtypje te asnjëra palë. Nëpërmjet një postimi në llogarinë e saj në Facebook, Bajrami e bëri të qartë adresimin e saj që në titull: PROPOZIM PËR SBASHK-un DHE QEVERINË.
Propozimi i deputetes Bajrami ishte ky:
– Të pranohet oferta e Qeverisë për shtesën 50 euro, por kjo shtesë të vazhdoj deri me 31.12.2022.
– Me 01.01.2023 të filloj implementimi i Ligjit të Pagave. Në rast se Ligji i Pagave nuk hyn në fuqi, të planifikohet buxhet që shtesa prej 50 euro të vazhdoj deri në hyrjen në fuqi të këtij ligji.
– Qeveria të mos zbatoj ndëshkime në paga, për muajin shtator.
I rekomandoj Qeverisë t’i pranoj këto kërkesa.
Shkollat dhe çerdhet të hapën të hënën.”
Sikurse propozimi i Golës, edhe propozimi i deputetes Bajrami, hasi në vesh të shurdhër.
Fol Drejt ka provuar të mësoj nëse Ministria e Arsimit, Shkencës, Teknologjisë dhe Inovacionit (MAShT), ka ndërmarr diçka drejt lëvizjes së gjërave, përkatësisht tejkalimit të ngërçit, por, në përgjigjen e dërguar në adresë të redaksisë, mësohet se situata mbetet e njëjtë.
“Si Ministri e Arsimit kemi qenë vazhdimisht të hapur për takime me Sindikatën e Bashkuar të Arsimit, Shkencës dhe Kulturës. Po ashtu, Qeveria e Republikës së Kosovës ka ndërmarrë një varg veprimesh konkrete përfshirë pakon e ofruar për përballje me inflacion nga e cila përfitojnë edhe punëtorët e arsimit. Në kuadër të kësaj, Qeveria tashmë e ka bërë të qartë se kjo pako do të rishikohet edhe për vitin e ardhshëm.
Gjithashtu, në Projektligjin për paga i cili është në debat publik, janë marrë për bazë të gjitha kërkesat dhe janë trajtuar me kujdes të veçantë të gjitha kategoritë e punëtorëve të arsimit. Janë ngritur koeficientët në të gjitha kategoritë e mësimdhënësve dhe stafit tjetër të shkollave.
Nga ana tjetër, Sindikata e Arsimit edhe përkundër këtyre hapave që i ka ndërmarrë Qeveria, është duke insistuar në kërkesën për 100 euro” – kanë thënë nga MAShT.
Për më shumë, sipas MAShTI-t, “një numër i madh i shkollave në komuna të ndryshme tashmë kanë filluar procesin mësimor andaj Ministria e Arsimit edhe njëherë u bënë thirrje të gjithë mësimdhënësve që të fillojnë mësimin dhe në të njëjtën kohë të japin kontributin e tyre me komente e sugjerime në Projektligjin për paga.”
Po ashtu në përgjigje MAShTI ka bërë thirrje “që të ndalen presionet tek mësimdhënësit të cilët duan të fillojnë procesin mësimor e të mos pengohen në kryerjen e detyrës së tyre.”
Por anëtari i Këshillit Grevist, avokati Ali Sefaj, i ka bërë thirrje Kryeministrit Albin Kurti që të reflektojë, duke ia kujtuar që vendin e presin punë shumë të mëdha:
“Kryeministër nuk ligesh para hasmit (Serbisë) dhe as ndërkombëtareve, nëse ua plotëson kërkesat dhe nevojat “ushtarëve” dhe qytetarëve të tu, po përkundrazi dërgon mesazhe shtetari që din me marrë vendime të arsyeshme. Kushdo që të këshillon ndryshe s’ta do të mirën ty, qeverisë dhe as Kosovës!
Fillo dialogun social, ndali grevat dhe grahju punëve se vendi s’ka komoditet as alternativë tjetër. Reflekto!”
Megjithatë, deri në këtë orë “terri” po vijon t’i mbulojë shumicën e shkollave fillore dhe të mesme në Kosovë./FolDrejt/
