Qe një ditë e rrëmujshme. Mëngjesi shfaqi një pamje tjetër në rrugët hyrëse që të çojnë drejt kryeqytetit: kolona të gjata të veturave, bori që nuk pushonin së rëni, një mbingarkesë e paparë në komunikacion, vonesa, pritje dhe shoferë të revoltuar, shkruan Fol Drejt.
Prova e parafundit
Në njoftimin e fundit, që ende figuron në faqen zyrtare të Komunës së Prishtinës, ndër të tjera thuhet:
“Ju njoftojmë se, se nga dita e premte më datë 28 tetor deri të dielën më 30 tetor, vazhdon testimi i radhës i shndërrimit të gjithë unazës qendrore të Kryeqytetit në qarkore njëkahëshe për automjetet.”
Ideja e riorganizimit të trafikut, sipas zyrtarëve komunalë, është pikërisht çlirimi nga mbingarkesa e komunikacionit e cila e karakterizon kryeqytetin.
Vetë Alban Zogaj, nënkryetar i komunës, para 18 orësh paralajmëron se vendimi final rreth kësaj çështjeje do të merret pas testit të radhës:
“Nesër dhe në fundjavë e testojmë edhe një herë unazën e brendshme si qarkullim një-kahor! Pastaj do të marrim vendimin final.”
Revoltë e gallatë
Me mëngjes, kritikat e shumta e shigjetuan të parin e kryeqytetit, kryetarin Përparim Rama. “Vrojtuesit e lagjes” – një faqe e mbajtur prej qytetarëve të Prishtinës, kritikoi testimin duke ua kujtuar zyrtarëve komunalë që kryeqyteti nuk ka kapacitete të tilla për ndryshime kaq radikale:
“Komuna nuk duhet të bëjë testime në kohën kur qytetarët paguajnë gati 2 euro për një litër naftë. Komuna duhet të ofrojë kushte si korsitë e veçanta për autobusë, që qytetarët të shfrytëzojnë më pak makinat. Nuk kemi infrastrukturë për testime të tilla!”
Por reagimi më i ashpër erdhi nga Këshilli për Mbrojtjen e të Drejtave dhe Lirive të Njeriut (KMDLNj), i cili qytetarët e Prishtinës i cilësoi si “minj” pjesë të një eksperimenti të madh.
“Deri më tani ky eksperiment ishte provuar vetëm të shtunave dhe të dielave, ditëve kur trafiku edhe ashtu shkarkohej shumë duke shkaktuar vështirësi por jo, as për së afërmi në masë sikur ndodhi sot në Prishtinë. Të bësh eksperiment në ditën më të ngarkuar të javës (dita e premte) nuk mund të interpretohet ndryshe përveç se një veprim jashtë çdo logjike apo kontribut për shkaktim të qëllimshëm të kaosit në trafik” – thuhet ndër të tjera në reagim.
Por kishte edhe reagime të atilla, me humor, sarkazëm e ironi.
Një qytetar duke dashur ta përshkruante kaosin që e shkaktoi testimi, shkroi në llogarinë e tij në facebook:
“Dhe pastaj djalli tha: bëjini njëkahëshe rrugët e Prishtinës!”
Shumë qytetarë u ankuan që veprimi ishte i pamenduar dhe që u shkaktoi shumë telashe. Qendra, megjithatë, frymoi përgjatë këtyre orëve më lirshëm dhe me më pak zhurmë.
Megjithatë mbetet në pikëpyetje, nëse rrugët alternative që janë përzgjedhur për ta ri-orientuar trafikun, posedojnë kapacitetin e mjaftueshëm për ta përthithur atë, pa shumë vonesa./FolDrejt/
