Pak orë përpara se Gjykata Speciale të shpallte aktpadinë ndaj presidentit Hashim Thaçi, ky i fundit dha një intervistë të fuqishme për median gjermane Frankfurter Allgeimene Zeitung. Ai aty potencoi se asnjë konflikt nuk është zgjedhur vetëm nga BE, kurse është fat që në gjithë këto halle që po kalon bota, presidenti Donald Trump gjen kohë për t’u marrë me pajtimin mes Beogradit dhe Prishtinës. Zgjidhja ka vetëm kur përfshihen amerikanët.
“Amerikanët tregojnë edhe njëherë se ata janë më efikasë, më të shpejtë dhe më të qartë sesa europianët. Andaj është e domosdoshme pjesëmarrja amerikane në dialog. Në rast se ka një dritë në fund të tunelit, atëherë kjo dritë vjen nga Uashingtoni,” tha Thaçi për FAZ, përcjell foldrejt.com.
Përndryshe, po në atë intervistë Thaçi tregoi se nuk është i kapur nga Gjykata Speciale. Pavarësisht se shpesh mediat ndërkombëtare, por edhe ata shqiptare, e akuzuan se Thaçi është i kapur nga Gjykata Speciale dhe është i gatshëm ta pranojë secilën marrëveshje për ti shpëtuar arrestimit, në fakt vetë aktpadia kundër tij tregoi të kundërtën. Ai nuk ka pranuar amnisti përkundër interesave të Kosovës, kurse pak orë përpara aktpadisë nga Speciale, ai si asnjëherë u shpreh i vendosur:
“Serbët kanë kryer gjenocid. Kanë vrarë 13 mijë civilë, prej të cilëve mbi 1300 fëmijë. Kanë kryer qindra masakra, një milion të zhvendosur dhe deri në 20 mijë gra të përdhunuara. Ky pastrim etnik kurrë nuk do marrë amnesti,” tha Thaçi i vendosur, përkundër që mund të kishte marrëveshje në Uashington./Foldrejt.com
