Presidenti i Kosovës Hashim Thaçi, gjatë qëndrimit të tij në Davos ka gjetur kohën të jap një intervistë për median zvicerane 20min.ch, informon foldrejt.com. Ai ka folur për marrëdhëniet mes Kosovës dhe Zvicrës, diasporën shqiptare në Zvicër, gjestin e shqiponjës nga Xhaka e Shaqiri dhe për tema tjera.
“Ne kemi marrëdhënie të shkëlqyeshme me Zvicrën. Diaspora më e madhe e botës jeton këtu. Për këtë natyrisht duam të përmirësojmë dhe thellojmë marrëdhëniet. Unë i jam falenderues Zvicrës, që na ka pritur me duar të hapura,” tha fillimisht Thaçi, informon foldrejt.com. “Qëllimi ynë është të jemi Zvicra e Ballkanit. Të jemi një shtet multietnik dhe me ekonomi të zhvilluar, mirëqenie dhe paqe.”
Thaçi fillon të qeshet, kur pyetet nëse shqiptarët e Zvicrës janë më të përpiktë në orar sesa ata në Kosovë – duke u përgjigjur më pas – se “shqiptarët janë të njëjtë, pavarësisht se ku ata jetojnë.”
Më tej nuk kishte si të shpëtonte biseda për sportin.
“Sporti i bashkon njerëzit. Por loja mes Zvicrës dhe Serbisë ishte tepër emocionale. Do isha i kënaqur sikur Xhaka, Shaqiri dhe Co. të luanin për Kosovën, por unë e vlerësoj vendimin e tyre. I njoh familjet e tyre. Janë familje mjaft të mira, të cilat janë përfshirë në gjërat kombëtare. Ne e shijuam shqiponjën dykrenore, kur ata shënuan golat,” tha Thaçi duke shtuar se festimin me shqiponjën dykrenore nuk e sheh si problem.
Rreth ushtrisë ai pasi falenderon përfshirjen e Zvicrës në KFOR, thotë se ushtarët helevetë janë pasqyrë për ushtrinë e ardhshme të Kosovës.
‘Serbia është armiku më i madh i Kosovës. Por është e vërtetë që unë përpiqen të arrij një Marrëveshje me Serbinë,” tha më tej Thaçi, duke shtuar se i respekton të gjithë qytetarët, edhe ata që e kanë votuar për 12 vjet edhe ata që nuk e votojnë – pasi është në “shërbim të të gjithëve”.
Në fund Thaçi është pyetur edhe për aktivisten e gjelbër Greta Thunberg.
“Greta është pjesë e Davos. Të jesh i Gjelbër, për mua sot është patriotizmi më i madh që mund të tregohet. Kjo vlen edhe për Kosovën, rajonin dhe gjithandej. Të jesh sot patriot, nuk do të thotë të fillosh luftë, por të mbjellësh pemë.”/Foldrejt.com
