Imazhet e Mesut Ozil u shfaqën në ndeshjen e Gjermanisë kundër Spanjës pas protestës së palës gjermane për ndalimin e shiritit “One Love” nga Kupa e Botës, shkruan Al Jazeera, përcjell Fol Drejt.
Tifozët e futbollit në Katar janë parë duke kundërshtuar protestën e ekipit gjerman në Kupën e Botës për ndalimin e shiritave “One Love” duke mbajtur fotografi të ish-lojtarit të skuadrës gjermane, Mesut Ozil, i cili u bë objekt i abuzimit racist në Gjermani.
Grupi i tifozëve në ndeshjen Spanjë-Gjermani të dielën mbuluan gojën teksa mbanin në duar kopje të skicave të Ozilit të vizatuara me dorë dhe foto të tij me kombëtaren Gjermane.
Shfaqja e koordinuar ishte me sa duket në përgjigje të gjestit protestues të lojtarëve gjermanë javën e kaluar kur ata mbuluan gojën gjatë një fotografie para ndeshjes për të protestuar kundër FIFA-s – organi qeverisës i futbollit botëror – kundër ndalimit të shiritave “One Love” në Kupën e Botës.
Duke mbuluar gojën, tifozët të dielën dukej se po i referoheshin trajtimit të dyshimtë të Gjermanisë ndaj Ozilit, ish-lojtarit të tyre që u largua nga ekipi kombëtar gjerman pasi u bë objekt i abuzimit racist dhe një “kokë turku” për largimin e hershëm të Gjermanisë nga Kupa e Botës në 2018.
Ozil, i lindur në Gjermani me prejardhjeturke, akuzoi federatën gjermane të futbollit, tifozët dhe mediat për racizëm në trajtimin e tyre ndaj njerëzve me rrënjë turke.
“Unë jam gjerman kur fitojmë, por jam emigrant kur humbim”, tha Ozil në momentin e largimit të tij nga kombëtarja gjermane.
Ozil konsiderohej si një nga mesfushorët më të mëdhenj të gjeneratës së tij dhe tërheqja e tij befasuese nga skuadra gjermane në vitin 2018 shkaktoi tronditje.
“Me zemër të thyer dhe pas shumë konsideratave, për shkak të ngjarjeve të fundit, unë nuk do të luaj më për Gjermaninë në nivel ndërkombëtar, ndërkohë që kam këtë ndjenjë racizmi dhe mosrespekti”, shkroi ai në Twitter në atë kohë.
“Kam veshur fanellën gjermane me kaq krenari dhe emocion, por tani nuk e bëj… Racizmi nuk duhet pranuar kurrë, asnjëherë.”
Ozil përmendi gjithashtu deklaratat e politikanëve gjermanë, talljet raciste nga fansat dhe pmesazhet e urrejtjes si shembuj të klimës armiqësore me të cilën ai dhe familja e tij u përballën deri në vendimin e tij.
Abuzimi filloi para Kupës së Botës 2018 kur Ozil dhe shoku i skuadrës së Gjermanisë, Ilkay Gundogan kishin bërë fotografi me presidentin turk Rexhep Tajip Erdogan. Gundogan gjithashtu ka një prejardhje familjare turke. Ai u tall më pas nga mbështetësit gjermanë gjatë një ndeshjeje përgatitore të Kupës së Botës.
Abuzimi i Ozilit, në veçanti, u rrit pas turneut, i ndihmuar nga deklaratat nxitëse të menaxherit të ekipit gjerman Oliver Bierhoff dhe presidentit të federatës në atë kohë, Reinhard Grindel.
Grindel më vonë tha se ai duhet t’i kishte dhënë më shumë mbështetje Ozilit.
Pasi luajti në ndeshjen e së dielës në stadiumin Al Bayt, në të cilën Gjermania dhe Spanja barazuan 1-1, Gundogan tha se ai thjesht donte të fokusohej në futboll që tani e tutje.
“Sinqerisht, pikëpamja ime është: tani politika ka mbaruar,” tha Gundogan.
“Vendi i Katarit është shumë krenar që pret Kupën e Botës, gjithashtu vendi i parë musliman, dhe unë vij nga një familje muslimane. Kështu që komuniteti musliman është krenar. Kështu që unë mendoj se tani ka të bëjë vetëm me futbollin.” /FolDrejt/
