Në takimet është diskutuar mbi ballafaqimin e përbashkët me krizën me mungesën e ushqimit dhe energjisë elektrike, tregtinë dhe tregu i punë, si dhe çështje të tjera
Delegacionet nga Qeveria e Shqipërisë, Maqedonisë së Veriut dhe Serbisë kanë realizuar në Tiranë takime pune për të diskutuar mbi marrëveshjet e arritura dhe bashkëpunimin në të ardhmen për fusha të ndryshme në kuadër të nismës “Ballkani i Hapur”, shkruan AA, transmeton Fol Drejt.
Në takimet me temë “Sfidat kryesore dhe zgjidhjet lehtësuese për rajonin”, është diskutuar mbi ballafaqimin e përbashkët me krizën me mungesën e ushqimit dhe energjisë elektrike, tregtinë dhe tregu i punë, si dhe çështje të tjera.
Në fund të takimeve dyditore, zv.kryeministri dhe ministri i Shtetit për Rindërtimin dhe Programin e Reformave në Qeverinë e Shqipërisë, Arben Ahmetaj, zëvendëskryeministri i Maqedonisë së Veriut për çështje ekonomike, koordinim të resorëve ekonomike dhe investimeve, Fatmir Bytyqi dhe zëvendëskryeministri dhe ministri i Bujqësisë, Pylltarisë dhe Administrimit të Ujërave i Serbisë, Branislav Nedimoviç, mbajtën një konferencë të përbashkët për mediat.
Ahmetaj tha se në samitin e ardhshëm në Beograd, më 1 shtator, të gjitha palët do të jenë të gatshme të nënshkruajnë protokollin e marrëveshjeve për ndërlidhjet e skemave për identifikim elektronik dhe akses të lirë në tregun e punës.
“Tre korsitë kryesore ku do të fokusohemi për të bashkërenduar energjitë dhe hapat konkretë të veprimit në vijim janë siguria energjetike, siguria ushqimore, mbrojtja civile dhe menaxhimi i riskut të fatkeqësive natyrore”, tha Ahmetaj.
Ai theksoi se në takime u shpreh interesi për bashkëpunim në fushat e kryerjes së investimeve të përbashkëta në shtim kapacitetesh të energjisë elektrike, si nga burimet e rinovueshme, apo nga burime të tjera si LNG, si dhe mbajtjen e linjave të transmetimit të hapura ndërmjet vendeve në mënyrë që të mundësohet kalimi i flukseve të energjisë për përballimin e situatës së krizës energjetike.
– Bytyqi: “Prioriteti jonë është ndërlidhja rajonale”
Bytyqi tha se edhe në nivel teknik, edhe politik janë dakorduar për të tejkaluar krizën energjetike, si dhe për efektet e mundshme të luftës në Ukrainë për sa i përket mungesave në ushqim.
“Vetëm bashkërisht duhet t’i adresojmë këto dhe t’i tejkalojmë. Dhe konsideroj që kjo për rajonin e Ballkanit Perëndimor është një hap historik. Prioriteti jonë është ndërlidhja rajonale. Si tre vende jemi të pajtimit që siguria e ushqimit në kushtet e krizës botërore paraqet sfidë dhe për këtë qëllim duhet të krijohen të gjithë mekanizmat e bashkëpunimit ndërmjet vendeve tona”, tha Bytyqi.
Nedimoviç theksoi se nisma “Ballkani i Hapur” është një plus për të tre popujt.
“Jam i bindur thellësisht që për këtë rrëfim ekonomik për ne do të flasë më së miri biznesi, sektori i biznesit. Jemi duke i mënjanuar edhe barrierat dhe paragjykimet që kanë ekzistuar”, tha Nedimoviç.
Iniciativa “Ballkani i Hapur” aktualisht mbulon një zonë ekonomike dhe politike midis Shqipërisë, Maqedonisë së Veriut dhe Serbisë, që synon të nxisë mundësitë e tregtisë, qarkullimit të njerëzve, mallrave, shërbimeve dhe kapitalit për rreth 12 milionë njerëz, si dhe të inkurajojë integrimin e të tre vendeve në BE.
