Kapiteni i Lazios, Ciro Immobile, ka mbetur i padëmtuar në aksidentin trafiku, i cili ndodhi mëngjesin e sotëm në Romë, pasi futbollisti i klubit romak u përplas me një tramvaj, raporton Gazzetta dello Sport.
Mediat italiane raportojnë se tramvaji në linjën numër 19 ka kaluar në semafor të kuq në kryqëzim dhe është përplasur me një automjet që drejtohej nga kapiteni i Lacios, përcjell Fol Drejt.
Në këtë aksident trafiku janë lënduar disa pasagjerë të tramvajit. Mediat italiane raportojnë se të gjithë pasagjerët janë plagosur lehtë, ndërsa një person është dërguar në spital.
“Tramvaji kaloi nëpër një semafor të kuq. Për fat të mirë jam mirë. Thjesht më dhemb pak krahu”, tha Imobile pas aksidentit automobilistik.
Mediat italiane thonë se më shumë detaje për këtë aksident do të dihen pas hetimeve të policisë, të cilat janë në vijim.
Gazzetta dello Sport pretendon se makina e futbollistit të Lazios i është shkatërruar pjesa e përparme dhe shton se Imobile i ka shpëtuar dëmtimit të rëndë me fat.
Mediat italiane besojnë se kapiteni i Lacios do të jetë gati për ndeshjen e radhës në Serinë A kundër Torinos, e cila do të luhet më 22 prill./FolDrejt/