Policia franceze qëlloi të martën 17-vjeçarin Nahel M., i cili më pas nuk iu mbijetoi plagëve të marra. Pas kësaj, disa qytete në Francë u tronditën nga demonstrata në rrugë, përleshje me policinë dhe trazira në të cilat deri më tani janë arrestuar afro 700 persona, raporton Klix, përcjell Fol Drejt.
Në Paris për të tretën natë radhazi vazhduan përleshjet e ashpra mes policisë dhe demonstruesve dhe vetëm mbrëmë u arrestuan mbi 400 persona.
Dyqane të shumta u plaçkitën dhe makinat u dogjën megjithë praninë e madhe të policisë. Franca vendosi 40,000 policë në të gjithë vendin, por edhe kjo nuk e pengoi shpërthimin e dhunës.
Trazirat filluan të martën pasi një oficer policie vrau një djalë 17-vjeçar me origjinë algjeriano-marokene, Nahel M, i cili u përpoq të largohej me makinë kur u ndalua nga policia. Polici që qëlloi Nahelin i kërkoi falje familjes. Ai akuzohet për vrasje, ndërsa avokati i tij pretendon se është i “shkatërruar”.
Nga Lille në veri deri në Marsejë në jug, ndërtesat publike, dyqanet dhe automjetet u sulmuan sërish mbrëmë. Në Roubiax, qiramarrësit e hoteleve u detyruan të dilnin në rrugë pasi ndërtesa mori flakë.
Muret përreth qyteteve janë shkruar me mesazhet “drejtësi për Nahelin”, “rebelim për Nahelin”, “hakmarrje për Nahelin”. Disa banorë, kryesisht më të rinj, premtuan një mbrëmje edhe më brutale se ajo e mëparshme.
Presidenti Emmanuel Macron do të zhvillojë sot një takim të ri të krizës, për shkak të të cilit do të kthehet herët nga një udhëtim zyrtar në Bruksel. /FolDrejt/
