Njëzet e pesë persona u arrestuan në bastisjet e policisë në të gjithë Gjermaninë, të dyshuar për komplot për të rrëzuar qeverinë. Mediat në Gjermani thonë se bëhet fjalë për një grup ekstremistësh të djathtë dhe ish-ushtarakë, të cilët planifikonin të hynin në ndërtesën e parlamentit dhe të merrnin pushtetin. Të dyshuarit akuzohen për përgatitjen e veprimeve të bazuara në ideologjinë e tyre, të tilla si blerja e pajisjeve, rekrutimi i anëtarëve të rinj dhe kryerja e trajnimit për të shtënat.
Bastisjet u kryen nga më shumë se 3 mijë policë dhe pjesëtarë të forcave të sigurisë në 11 shtete federale gjermane. Arrestimet u kryen në Baden-Wuerttemberg, Bavari, Berlin, Hesse, Saksonia e Ulët, Saksonia dhe Turingia, si dhe në Austri dhe Itali.
Një burrë i përshkruar si princ dhe i quajtur Heinrich 13 përmendet si person kyç për planet e tyre.Ai është 71 vjeç.
Sipas prokurorëve federalë, në mesin e të arrestuarve në 11 provinca gjermane ishin dy që dyshohet se udhëhoqën përpjekjen për grusht shteti, raporton BBC, transmeton Fol Drejt.
Të dyshuarit thuhet se përfshijnë anëtarë të lëvizjes ekstremiste Reichsbürger (Qytetarët e Rajhut), e cila ka qenë prej kohësh nën vëzhgim nga policia gjermane për sulme të dhunshme dhe teori konspirative raciste. Ata gjithashtu refuzojnë të njohin shtetin modern gjerman.
Ministri i Drejtësisë Marco Buschmann tha në Twitter se një “operacion i madh anti-terrorist” është duke u zhvilluar dhe se të arrestuarit “po planifikonin një sulm të armatosur ndaj organeve kushtetuese”. Kryeprokurori tha se grupi kishte planifikuar një grusht shteti të dhunshëm që nga nëntori 2021.
Ata planifikonin edhe vrasje
Ish anëtarët e ushtrisë gjermane luajtën një rol të rëndësishëm në organizimin dhe planifikimin e grushtit të shtetit. Mes tyre ishin edhe ish-anëtarë të forcave speciale elitare. Komplotistët, njoftoi zyra e prokurorisë federale, planifikonin të sundonin personalisht Gjermaninë. Komplotistët besonin se qëllimet e tyre mund t’i arrinin vetëm me “mjete ushtarake dhe dhunë kundër përfaqësuesve të shtetit”, ku përfshiheshin edhe vrasje.
Televizioni publik gjerman ZDF njoftoi se në konspiracion ishte i përfshirë edhe ish-përfaqësuesi i ekstremit të djathtë të Bundestagut, i cili sipas planeve të puçistëve do të emërohej ministër i Drejtësisë. “Princi Heinrich” supozohej të ishte lideri i Gjermanisë pas grushtit të shtetit, shkruan BBC, transmeton Fol Drejt.