Këshilltarja e ministrit për komunitete dhe kthim në Qeverinë e Albin Kurtit, Rada Trajkoviq, pas konferencës së sotme për media të presidentit të Serbisë, ka shtruar tre pyetje për Aleksandër Vuçiqin lidhur me barrikadat, shkruan Danas, përcjell Fol Drejt.
“1. Pse Lista Srpska “u bë naive për katër bazat” në veri? 2. A nuk e dinim ne për “katastrofën e mundshme me NATO-n” para se të nxisnim njerëzit në barrikada dhe të ngrinim gatishmërinë luftarake? 3. Çfarë ishte në fakt qëllimi i barrikadave dhe interes (privat) i kujt?” ka shkruar Rada Trajkoviq në Twitter, ndërsa për ilustrim ka postuar një pjesë të reportazhit të Nova.rs.
Gjatë krizës në barrikada, në mesin e dhjetorit, Rada Trajkoviq u ndalua rrugës për në Kosovë, për një takim me ambasadorin e ShBA-së në Prishtinë, Geoffrey Hovenier dhe akoma më gjatë në rrugën e saj për në Serbinë qendrore.
Ajo është transportuar nga vendkalimi kufitar në spitalin e Prokuplës. Autoritetet shtetërore nuk dhanë shpjegim zyrtar për këtë ndalim, ndërsa Rada Trajkoviq, e cila me profesion është mjeke, publikoi foto të mavijosjeve, duke pretenduar se ato ishin pasojë e qëndrimit gati 24 orësh në vendkalimin kufitar në Merdare.
Partia Radikale Serbe joparlamentare e Vojisllav Sheshelj publikoi informacione të supozuara në faqen YouTube se ku punojnë tre fëmijët e rritur të Rada Trajkoviqit.
Ajo më vonë njoftoi në Twitter se vajza e saj u ndalua në mënyrë të pashpjegueshme në aeroportin Nikola Tesla, por se ajo arriti të kthehej në Londër.
Rada Trajkoviq dhe Aleksandër Vuçiq ishin zyrtarë të lartë, deputetë dhe ministra të Partisë Radikale Serbe në vitet 1990. /FolDrejt/
