Tre të vdekur nga plumbat në protestat antiqeveritare në Haiti

Tre persona janë vrarë nga plumbat që nga e hëna në protestat në Haiti , sipas një organizatori të protestës dhe policisë, ndërsa një lëvizje që kërkon dorëheqjen e kryeministrit Ariel Henri përhapet në disa qytete të vendit, shkruan protothema, transmeton Fol Drejt.

Që nga e hëna, postblloqe janë vendosur në rrugët kryesore të Haitit jugor dhe transporti publik dhe dyqanet kanë ndaluar funksionimin. Protestuesit ankohen kryesisht për mungesë karburanti dhe pasiguri.

Një protestues u vra të hënën në kryeqytetin Port-au-Prince nga sulmues të panjohur që hapën zjarr ndaj turmës, sipas Serge Jean-Louis, një kundërshtar i Ariel Henrit dhe një organizator i demonstratës.

“Ky është një sulm serioz ndaj lirisë për të mbajtur demonstrata në vend. Një burrë u vra për (kërkuar) kushte më të mira jetese në vend,” vuri në dukje ai.

Në Haitin jugor, dy persona u vranë të martën ndërsa forcat e sigurisë u përpoqën të heqin bllokimin e një rruge që të çon në një aeroport, tha një zyrtar i policisë, duke mohuar çdo përgjegjësi për vdekjet.

Oficerët e policisë plagosën me plumba katër persona që morën pjesë në grabitjen e zyrave të organizatës bamirëse, pranoi në të njëjtën kohë zyrtari në një konferencë për shtyp që dha./FolDrejt/