Ditët e fundit kanë shpërthyer akuzat publike të eksponentëve të lartë të partisë shqiptare në pushtet BDI, lidhur me pakënaqësinë ndaj bartësve të përgjegjësive ekzekutive në këtë parti, transmeton Fol Drejt.
Deputetë, kryetarë komunash e drejtorë kryesisht nga zona e Shkupit (degët e Çairit dhe Sarajit), kanë hedhur akuza ndaj ministrave të BDI-së, dhe në veçanti kanë shprehur pakënaqësitë e tyre me punën e zëvendëskryeministrit të parë të Qeverisë, Artan Grubi.
“Zëvendëskryeministri i parë Artan Grubi dhe disa ministra të tjerë të japin dorëheqje ose t’i zëvendësojë lideri Ali Ahmeti, përndryshe lufta në BDI do të përshkallëzohet”, ka thënë Musa Xhaferi, një nga eksponentët e grupit të pakënaqur, në një deklaratë për “Shtypin e Lirë”.
Përderisa Xhaferi ka paralajmëruar luftë të hapur nëse nuk ka ndërrim ministrash, Grubi mohon se ka përçarje në BDI dhe thotë se të gjithë janë pas liderit Ahmeti. Për Ahmetin, megjithatë, pakënaqësia e nuk është shqetësuese dhe beson se do të tejkalohet me debat.
Pasi ditë më parë përfundoi takimet me degët e Çairit dhe Sarajit, kryetari i BDI-së Ali Ahmeti tha se do të punojë në pajtimin e strukturave, sepse nuk dëshiron të lejojë të shkatërrohet një thesar që doli nga shumë sakrifica.
“Pakënaqësitë gjithmonë janë drejtuar tek mediat ose tek unë, dhe të drejtosh një organizatë e lëvizje 20 vite nuk është e lehtë. Ka marrëdhënie ndërnjerëzore që nuk janë të mira, por jo si tërësi. Janë njerëz të caktuar, por në tërësi BDI është thesar kombëtar i shqiptarëve në RMV që nga Struga deri në Likovë. Sot kam folur për marrëdhënie ndërnjerëzore dhe do rregullohen. Kam 20 vite që menaxhoj me njerëz, nuk ka ekzekutiv që nuk ka kaluar pa sulme e hidhërime. Musën e kam marrë në mbrojtje 20 vite, 4 vite kam qenë në mbrojtje të Abdylaqim Ademit. Ekzekutivi ka problematikat tjera, dega ka probleme tjera, komuna probleme tjera, dhe natyrshëm lindin kontradiktat në mes institucioneve”, ka theksuar Ahmeti.
Sipas tij, nuk ka asgjë shqetësuese nga ajo që flitet e përflitet dhe kjo është në kuadër të normalitetit, dhe se ai është ithtar që debatet nuk duhet mbytur, po përpiqet të bashkoj shqiptarët e jo t’i shpërndajë.
Edhe vetë më i apostrofuari, zëvendëskryeministri Grubi një ditë më parë iu është përgjigjur akuzave, duke thënë se në këtë kohë nuk ka nevojë për defokusim të panevojshëm të opinionit.
“Në kohën kur po ballafaqohemi me krizë energjetike, me krizë çmimore, me krizë të sigurisë, kur po ballafaqoheni me skriningun dhe vettingun mese të nevojshëm në politikë tek politikanët, gjykatësit dhe prokurorët si dhe luftën kundër krimit dhe korrupsionit, kur po mundohemi ta hapim kushtetutën me 80 deputet, kur jemi në përfundim e sipër të Shkup-Tiranë me autostradë dhe Shkup-Prishtinë me autostradë, kur jemi në rrumbullakim të gjitha këtyre projekteve, nuk kemi nevojë për defokusim të panevojshëm dhe ne të gjitha forcat i kemi përqendruar në realizimin e të gjitha këtyre çështjeve programore”, është shprehur Grubi.
Ndryshe, kjo është përplasja më e madhe politike brenda BDI-së, e cila është në pushtet plot 20 vjet dhe fituese e gati të gjitha cikleve zgjedhore në kampin politik shqiptar në Maqedoninë e Veriut./FolDrejt.com/
