Në kohën kur udhëtimet jashtë shtetit bëhen gjithmonë e më të pamundura, vjen nevoja për zhvillimin e turizmit vendor. Duke jetuar në rajonin e Dibrës, por jo vetëm, natyrshëm të lind ideja që kësaj here të vizitohen pikat më piktoreske të vendit që janë malet e larta dhe me plot faunë e florë të pasur. Në vijim Foldrejt.com, ju tregon disa vende që ju mund ti shikoni gjatë qëndrimit në Dibër, ku kërkohet pak kohë, por do ju lë mbresa për gjithë jetën.
1 .Galiçniku
E ndodhur në rrafshnaltën e Bistrës, ky fshat është mjaft i zhvilluar dhe me infrastrukturë të mirë nga Mavrova. Përveç restoranteve të pasura me djath vendi, aty mund të ushtroni edhe sportin e kalërimin për fëmijë e të rritur.
Për të apasionuarit pas maleve mund të ngjitet për rreth dy orë maja e Medenicës, ku të ofron pamje të mrekullueshme të Korabit e Deshatit në Perëndim.
Nëse jeni me biçikletë ose fouristradë, nga Galiçniku mund të ktheni në Dibër përmes fshatit Selcë, ku rruga 9km off-road, të ofron mjaft dredhëza të egra.
2 . Selce, Tresonce, Gari
Shumë pranë Dibrës ndodhen një zinxhir fshatrash piktoresk dhe me banorë të paktë. Mes Stogovës dhe Bistrës, brenda një ditë mund të udhëtoni në Selcë, Tresonce dhe Gari. Rrugët janë të gjitha asfalt dhe Lumi i Vogël i jep freski rrugës të mbuluar me pemë. Aty mund të vizitohet edhe Ura e Drerit, mjaft e lartë dhe e hijshme.
Për bjeshkatarët, nga Ura e Drerit mund të shkohet në këmbë deri në Galiçnik, kurse me biçikletë ose veturë 4×4 mund të shkoni nga Tresonçja në Lazaropole.
- Drenok/Modric
Përveç Bistrës, rajon mjaft i bukur është edhe Shebenik-Jabllanicë. E zakonshme për vendin tonë, edhe aty gjen përrenj, çuka, kodra, brinja, gërxhe dhe pyje të gjelbëruar! Deri në Modric ngjitja me veturë është pa problem, kurse deri në Drenok pavarësisht asfaltit, rruga kërkon kujdes përshkak të gropave.
Prej Modriçit mund të ngjiteni në Majën e Raduçit, e cila kalon përmes burimit të lumit Modriç, atraksion mjaft i bukur ku të jep pamje nga qyteti i Dibrës dhe Liqeni i Ohrit.
Poashtu edhe në Drenok mund të shihet mjaft bukur panorama e Liqenit të Dibrës dhe pak mbi karaulën e dikurshme jugosllave, tashmë vendi është pasuruar nga dredhëzat e egra.
Fshatrat turq
E çuditshme por e vërtetë, pranë Dibrës ndodhen edhe fshatra turq, banorët e të cilëve thonë se origjina e tyre në ato vende është përpara se të vinin osmanët. Ato janë Koxhaxhiku, Novaku, Dolgashi, Elevci.
Si monument kulture mund të vizitohet edhe shtëpia muze e Ataturkut, ku ka jetuar gjyshi i Babait të Turqisë.
Falë asfaltimit të rrugës Elevcë-Novak, udhëtimi tash mund të bëhet nga magjistralja Dibër-Strugë, dhe më pas përmes Qendër Zhupës të dalësh deri në magjistralen Mavrovë-Dibër.
Broshticë-Antena
Kur jemi te Qendër Zhupa, një vend i lehtë për ngjitje është nga fshati Broshticë deri te Antena (Stogova), që të jep një pamje të mrekullueshme nga Radika, Liqeni i Dibrës dhe Drini i Zi. Pak mbi antenë, zona është mjaft e pasur me boronica të egra.
Për ata që kanë fouristrada, ngjitja deri në Antenë mund të bëhet me to, kurse në kthim mund të vizitohet edhe Gorno Melnicani.
Fusha e Lukovës, rruga Dibër-Prizren
I njohur si shtegu i ngjyrave, i pasur me lumenj, ujëvara dhe bimë të llollojshme, është Fusha e Lukovës ose siç njihet rëndom, rruga Dibër-Prizren. Kjo rrugë ka 25km off-road (me kalldrëm), por rrugëtimi në të do ju mbetet në mend gjithë jetën.
Aty mund të shikohen gjurmët e fshatrave të djegur – Reç, Shtirovica – por gjithashtu mund të vizitohen edhe vendet e burimeve të Radikës (Fusha e Lukovës së Epërme).
Maja e Korabit
Maja më e lartë e rajonit, Mali i Korabit 2764m, çdo vit është i këndshëm për t’u ngjitur. Si mundësi më e mirë është ngjitja nga ‘Karaula Pobeda’ pranë rrugës Dibër-Prizren, por nëse keni fouristradë të mirë ngjitja mund të kryhet edhe përtej staneve nga vendi i quajtur si “Karaula Verore”.
Ngjitja kërkon përgatitje fizike, por pamjet që të ofrojnë majat e Kabashit, Gurit të Kuq, Korabit të vogël, Kepit të Bardhë dhe Gropa e Fongot janë impresionuese.
Bitushë – Maja e Velivarit – Zhirovnicë
Një ngjitje pak më e lehtë se e Korabit të madh është maja e Velivarit, maja më e lartë e Deshatit. Ngjitja mund të nisë nga Zhirovnica ose për më lehtë nga fshati Bitushe, ku shikon edhe liqenin e mrekullueshëm të Lokuvit.
Për ata që kanë vetura 4×4, ngjitjen mund ta fillojnë nga bjeshkët e Zhirovnicës, 1800m lartësi mbidetare.
Fshatrat e Rekës së Epërme/Tanushë, Nivishtë, Grekaj, Nistrovë/Zhuzhnjë
Edhepse me kalldrëm, rruga e mirëmbajtur nga fshatarët e Rekës së Epërme (Luma e Epërme), tashmë këto fshatra me pak kujdes në vozitje, mund të shkohet edhe me vetura të thjeshta.
Rruga është mjaft piktoreske e ndodhur mes Përroit të Thellë. Në Tanushë mund të shihet monumenti i UÇK-së për nder të dëshmorit Tahir Sinani, kurse nga Nivishta mund të shkohet te ujëvara më e lartë e Ballkanit – Ujëvara Përroi i Thellë.
Në Nistrovë ndodhet shtëpia e Josif Bagerit, kurse deri në Zhuzhnjë mund të shkohet me fouristradë.
Në këtë rajon, më së miri do kuptoni vlerat historike të Rekës së Epërme, pasi banorët vendas flasin plot nostalgji dhe dhimbje për të kaluarën.
Banjisht-Elevce-Kosovrast i Epërm
Për ata që nuk kanë kohë për të humbur, një udhëtim mjaft i bukur nga qyteti i Dibrës është Banjisht-Elevce-Kosovrast i Epërm.
Ngjitja nga Banjishti deri në Elevcë është mes pyjeve të dendura që të japin freski edhe gjatë periudhës më të nxehtë. Kurse nga Elevca deri te Kosovrasti i Epërm është pa pemë, por me pamje nga Radika.
Kjo zonë ka çeshma të shumta, më e famshmja, Çezma e Laçes, por edhe e pasur me bimë e çajna të ndryshme./Foldrejt.com
Linqe të tjera:
https://www.facebook.com/gazeteerajonitteDibres/
https://www.facebook.com/BeautifulMountainsNM/
https://www.facebook.com/kbdibra/
https://www.facebook.com/DIBRA-Off-Road-4×4-101172214972956/
