Turqia të dielën tha se përpjekjet e shpëtimit pas tërmetit shkatërrues të javës së kaluar kishin përfunduar në të gjitha provincat, përveç dy sosh, shkruan Al Jazera, transmeton Fol Drejt.
Tërmeti me magnitudë 7.8 që goditi Turqinë juglindore dhe Sirinë veriore më 6 shkurt, ka vrarë më shumë se 46,000 njerëz, me gjasat për të gjetur të mbijetuar pas dy javësh jashtëzakonisht të largëta.
Kreu i agjencisë së menaxhimit të fatkeqësive të Turqisë, Yunus Sezer, tha të dielën se përpjekjet e kërkim-shpëtimit kishin përfunduar në të gjitha provincat, përveç Hatay dhe Kahramanmaras, ku ishte edhe epiqendra e tërmetit.
Përpjekjet po vazhdonin në rreth 40 ndërtesa në të dy provincat në ditën e 14-të, tha Sezer, por ai priste që numri të binte deri të dielën vonë.
Sezer tha gjithashtu se numri i të vdekurve në Turqi ishte rritur në 41,020. Numri i përgjithshëm, duke përfshirë Sirinë, tani është më shumë se 46,000.
Rreth 105,794 ndërtesa të kontrolluara nga Ministria e Mjedisit dhe Urbanizimit të Turqisë janë ose të shkatërruara ose aq të dëmtuara sa të kërkojnë prishje, tha ministria në një deklaratë të dielën.
Nga këto, 20,662 ishin shembur, thuhet në deklaratë. Ndërtesat e dëmtuara ose të shkatërruara përmbanin më shumë se 384,500 njësi, kryesisht apartamente banimi.
Shifrat ishin për Turqinë dhe nuk mbulonin ndërtesat e shembura dhe të dëmtuara në Sirinë fqinje.
Përfundimi i operacioneve të shpëtimit erdhi ndërsa Sekretari i Shtetit i SHBA Antony Blinken mbërriti në Turqi për të treguar solidaritet me aleatin e NATO-s dhe për të njoftuar një paketë të re ndihme me vlerë 100 milion dollarësh.
Ndihma e re “do të vijë së shpejti”, u tha Blinken gazetarëve. “Mjerisht, ka të bëjë më pak me kërkim-shpëtim, por me rikuperim afatgjatë.”
Në Twitter, Grupi i Mbrojtjes Civile “Helmetat e Bardha” tha se ishin takuar me Blinken në Turqinë jugore për të diskutuar “përgjigjen ndaj tërmetit në veriperëndim të Sirisë, situatën humanitare, mënyrat për të mbështetur civilët e prekur dhe mekanizmat për arritjen e rimëkëmbjes së hershme”.
Zëvendësdrejtori i Grupit Farouk Habib i tha Blinkenit se ishte mirënjohës për mbështetjen e SHBA-ve pas tërmetit, ndërsa ky i fundit i ngushëlloi dhe i përgëzoi për “përpjekjet heroike!”/FolDrejt/
