Hashim Thaçi ka qenë një ndër figurat më të larta të UÇK-së, por jo vetë UÇK-ja. Kur themi UÇK nënkuptojnë gjithë popullin shqiptar që u ngrit pas shumë dekadash shtypje prej pushtetit jugosllav. Sipas disa statistikave të fundit, rreth 80 përqind e të burogurve politik në burgjet jugosllave kanë qenë shqiptarë, e mjaftueshme për të kuptuar padrejtësinë e Vëllazërim-Bashkimit të trumbetuar nga komunistët jugosllavë dhe që më pas solli shovenizmit serb mbi popullatën civile në Kosovë, por edhe në Bosnjë dhe Kroaci.
Vetë europianët i dinë masakrat serbe mbi Kosovë, Kroaci dhe Bosnjë ku hollandezët panë me sytë e tyre vrasjen e mbi 8000 muslimanëve civilë në Srebrenicë. Por pavarësisht se ndokush është fajësuar për këto krime, Ivica Dacic dhe Aleksandër Vucic që ishin zëdhënës dhe ministra në kohën e Sllobodan Milloshevicit nuk janë akuzuar bile vlerësohen, kurse kolegët e tyre shqiptarë disa herë thirren nga Gjykata Speciale që vetëm se tregojnë padrejtësinë e tyre.
Jo për diçka, por sikur individë të caktuar të UÇK të kishin kryer krime, do u bëhej nder shqiptarëve që ata të akuzoheshin dhe dënoheshin pas luftës nga Gjykatat Ndërkombëtare, por në momentin që këto akuza vinë rreth dy dekada më pas, tregon se disa “ndërkombëtarë” janë bashkëfajtorë për bisedimet dhe allishverishet me disa udhëheqës të UÇK.
Ishte UÇK-ja ajo që sprapsi forcat serbe për të krijuar një shtet të fuqishëm anti-europian në zemër të Ballkanit Perëndimor dhe që më pas krijoi një shtet pro-perëndimor si Kosova.
Pa UÇK-në sot Kosova do ishte nën Serbinë dhe Rusia do ishte më shumë se kudo prezente në Ballkan. Pa UÇK-në sot akoma serbët do mbushnin burgjet me shqiptarë dhe ato pamje të rënda humanitare bota do i shikonte në mes të Europës. Andaj me UÇK-në erdhi liria dhe stabiliteti jo vetëm i shqiptarëve, por edhe i BE-së.
Kurrë falje Serbisë
Pak orë përpara se Gjykata Speciale të shpallte aktpadinë ndaj presidentit Hashim Thaçi, ky i fundit dha një intervistë të fuqishme për median gjermane Frankfurter Allgeimene Zeitung. Ai aty potencoi se asnjë konflikt nuk është zgjedhur nga BE, kurse është fat që në gjithë këto halle që po kalon bota, presidenti Donald Trump gjen kohë për t’u marrë me pajtimin mes Beogradit dhe Prishtinës.
“Amerikanët tregojnë edhe njëherë se ata janë më efikasë, më të shpejtë dhe më të qartë sesa europianët. Andaj është e domosdoshme pjesëmarrja amerikane në dialog. Në rast se ka një dritë në fund të tunelit, atëherë kjo drite vjen nga Uashingtoni,” tha Thaçi për FAZ, përcjell foldrejt.com.
Përndryshe, po në atë intervistë Thaçi tregoi se nuk është i kapur nga Gjykata Speciale. Pavarësisht se shpesh mediat ndërkombëtare, por edhe ata shqiptare, e akuzuan se Thaçi është i kapur nga Gjykata Speciale dhe është i gatshëm ta pranojë secilën marrëveshje, në fakt vetë aktpadia kundër tij tregoi të kundërtën. Ai nuk ka pranuar amnistri përkundër interesave të Kosovës, kurse pak orë përpara aktpadisë nga Speciale, ai si asnjëherë u shpreh i vendosur:
“Serbët kanë kryer gjenocid. Kanë vrarë 13 mijë civilë, prej të cilëve mbi 1300 fëmijë. Kanë kryer qindra masakra, një milion të zhvendosur dhe deri në 20 mijë gra të përdhunuara. Ky pastrim etnik kurrë nuk do marrë amnesti,” tha Thaçi i vendosur, përkundër që mund të kishte marrëveshje në Uashington./Foldrejt.com
