Ukraina është duke luftuar për të rilidhur shërbimet e ujit dhe energjisë elektrike për miliona njerëz pasi një breshëri raketash dhe dronësh rusë goditën infrastrukturën energjetike të mërkurën, duke lënë gati 80 për qind të vendit në errësirë, shkruan Al Jazeera, përcjell Fol Drejt.
Deri të enjten në mbrëmje, më shumë se 24 orë pasi sulmet ruse shkatërruan zonat e Kievit, kryebashkiaku i qytetit Vitali Klitschko tha se 60 për qind e shtëpive po vuanin ende nga ndërprerja emergjente. Me temperaturat që ranë nën zero, autoritetet e Kievit thanë se ishin në gjendje të rivendosnin shërbimet e ujit, por po punonin ende për të rikthyer dritat dhe ngrohjen.
“Përshtypja është se rusët po luftojnë kundër infrastrukturës civile,” tha në një deklaratë të enjten Jan Egeland, sekretari i përgjithshëm i Këshillit Norvegjez të Refugjatëve.
“Popullsia civile nuk mund të përballojë një dimër të tërë pa energji elektrike, ngrohje dhe ujë të pijshëm. Dhe tani është një pikë thyerjeje,” tha ai duke iu referuar sulmeve të vazhdueshme në rrjetin elektrik nga Moska.
Sistemi energjetik në Ukrainë është në prag të kolapsit dhe miliona njerëz i janë nënshtruar ndërprerjeve emergjente gjatë javëve të fundit pasi Rusia ka sulmuar objektet e energjisë në një përpjekje të dukshme për të detyruar kapitullimin pas nëntë muajsh lufte që ka parë që forcat e saj të dështojnë në shumicën e objektivave të tyre territoriale të deklaruara.
E parë nga hapësira, Ukraina është kthyer në një copëz të errët në glob gjatë natës, gjë që e treguan edhe imazhet satelitore të lëshuara nga NASA.
Organizata Botërore e Shëndetësisë ka paralajmëruar për pasoja “kërcënuese për jetën” dhe ka vlerësuar se miliona mund të largohen nga shtëpitë e tyre si rezultat, ndërsa ambasadorja e Shteteve të Bashkuara në Kombet e Bashkuara, Linda Thomas-Greenfield, tha se presidenti rus Vladimir Putin ishte “qartësisht duke u armatosur që gjatë dimrit t’iu shkaktojë vuajtje të pamasë popullit ukrainas”. /FolDrejt/
