Organi kulturor i OKB-së, UNESCO tha se 86 gazetarë u vranë në mbarë botën në vitin 2022, në krahasim me 55 në 2021. Meksika, Ukraina dhe Haiti ishin ndër vendet më vdekjeprurëse për gazetarët, shkruan Deutsche Welle, përcjell Fol Drejt.
Numri i gazetarëve të vrarë në mbarë botën është rritur ndjeshëm në vitin 2022, pasi regjistroi një rënie gjatë tre viteve të mëparshme, tha në një raport të hënën organi kulturor i OKB-së, UNESCO.
UNESCO raportoi vdekjen e 86 gazetarëve vitin e kaluar, me 19 të vrarë vetëm në Meksikë, të ndjekur nga 10 në Ukrainë dhe nëntë në Haiti.
Mesatarisht 58 gazetarë janë vrarë nga viti 2019 deri në vitin 2021, sipas raporteve të mëparshme të UNESCO-s, me 2021 që regjistroi 55 vrasje. Këto tre vite shënuan një rënie nga viti 2018, ku u vranë 99 gazetarë.
Drejtoresha e Përgjithshme e UNESCO-s, Audrey Azoulay, tha në një deklaratë se numri i viktimave të vitit 2022 ishte “alarmant”.
“Autoritetet duhet të dyfishojnë përpjekjet e tyre për t’i dhënë fund këtyre krimeve dhe për të siguruar që autorët të dënohen, sepse indiferenca është një faktor kryesor në këtë klimë dhune,” tha Azoulay.
Pse u vunë në shënjestër gazetarët?
Tre të katërtat e vrasjeve ndodhën në vendet pa konflikt, ku Amerika Latine është shtëpia e më shumë se gjysmës së vdekjeve.
Disa nga arsyet pse gazetarët u vranë ishin për shkak të hakmarrjes për raportimin e tyre mbi krimin e organizuar, konfliktin e armatosur ose rritjen e ekstremizmit.
Disa gazetarë u vranë gjithashtu për mbulimin e temave të ndjeshme si korrupsioni, krimi mjedisor, shpërdorimi i pushtetit dhe protestat.
“Nuk ka hapësira të sigurta” për gazetarët
UNESCO vuri në dukje se gati gjysma e gazetarëve të vrarë ishin në shënjestër ndërsa ishin jashtë detyrës. Disa u sulmuan gjatë udhëtimit, në parkingje apo vende të tjera publike, ndërsa të tjerët në shtëpitë e tyre në momentin e vrasjes.
Organi paralajmëroi se kjo nënkupton se “nuk ka hapësira të sigurta për gazetarët, edhe në kohën e tyre të lirë”.
Organi i OKB-së regjistroi gjithashtu mosndëshkimin për vrasjet e gazetarëve në 86%, një normë që ajo tha se ishte “tmerrësisht e lartë”, pavarësisht se ka shënuar progres në pesë vitet e fundit.
Përveç vrasjeve, gazetarët në vitin 2022 ishin edhe viktima të formave të tjera të dhunës. Kjo përfshinte zhdukjen me forcë, rrëmbimin, ndalimin arbitrar, ngacmimin ligjor dhe dhunën dixhitale, me gratë në shënjestër veçanërisht. /FolDrejt/
