Ushtria britanike po eksploron përdorimin e robotëve në zonat e konfliktit. Projekti Theus po shqyrton se si makineritë mund të zvogëlojnë nevojën që njerëzit të rrezikojnë jetën e tyre për të ofruar municion, rroba, ushqim dhe karburant. Tre kompanive u janë dhënë kontrata prej 3 milionë paundësh për të hetuar përdorimin e sistemeve autonome, duke përfshirë robotët.
Dega e prokurimit e Ministrisë së Mbrojtjes në Bristol tha se plani do t’i lejonte trupat të përdorin një “shërbim shpërndarjeje të stilit Amazon”. Robotët do të kenë aftësinë të operojnë vetë në ajër ose në tokë raporton “BBC”. Kjo fazë e parë e projektit do të eksplorojë gjithashtu përdorimin e qenve robotikë për të mbështetur trupat në mjedise urbane të rrezikshme dhe komplekse.
Udhëheqësi i Sistemeve Robotike dhe Autonome SO2C, Majori i Zhvillimit të Forcave të Ardhshme Matt McGarvey-Miles tha: “Aftësitë e sistemit robotik dhe autonom do të luajnë një rol në rritje në ofrimin e mbështetjes së vendosur në të ardhmen e afërt”. “Duke vepruar kështu do të rritet fuqia luftarake përmes rritjes së masës dhe ritmit të furnizimit, si dhe reduktimit të rrezikut për jetën për njerëzit tanë, duke çuar në një probabilitet të shtuar të suksesit të misionit”.
James Gavin, kreu i Grupit të Aftësisë së Ardhshme në Pajisjet dhe Mbështetjen e Mbrojtjes, tha se më shumë se 50 kompani kishin shprehur interes për projektin. “Ne punuam më pas me ritëm dhe shkathtësi për të identifikuar tre furnizues që ofronin zgjidhje të mundshme”.
Ai tha se projekti kishte tejkaluar fazat e para të planit të tij. “Ky projekt është një sukses edhe për ekosistemin e inovacionit të Ministrisë së Mbrojtjes”, shtoi ai./abcnews.al
