Ushtria Republikane Kombëtare mori përgjegjësinë për organizimin e vrasjes së propagandistit rus Vladlen Tatarsky, i cili u vra në një kafene në Shën Petersburg. Grupi u krijua në Rusi dhe qëllimi i shpallur është përmbysja e regjimit të Putinit, ka pak detaje për aktivitetet e tij, raporton Klix, përcjell Fol Drejt.
Pretendimi i përgjegjësisë nga NRA u raportua nga gazeta e pavarur ruse e lajmeve Meduza me bazë në Letoni dhe Ilya Ponomaryov, një ish-anëtar i Dumës së Shtetit që jeton në Ukrainë.
“Më 02.04.2023 organizuam dhe zhvilluam aksion kundër grupit të aktivistëve Z dhe personalisht kundër propaganduesit të njohur të luftës, kriminelit të luftës Maxim Fomin, i njohur si Vladlen Tatarski. Ky aksion ishte përgatitur dhe realizuar në mënyrë të pavarur dhe ne nuk kemi asnjë lidhje apo kemi marrë ndihmë nga çfarëdo lloj strukturash të huaja, e lëre më nga shërbimet e sigurisë”, thuhet në një deklaratë të NRA.
Ata theksuan se aksioni nuk ishte i drejtuar kundër civilëve dhe “të gjithë ata që vdiqën janë në mesin e pjesëmarrësve aktivë në luftë”.
Përfaqësuesit e organizatës u bënë thirrje gjithashtu aktivistëve rusë për të drejtat e njeriut që të ndihmojnë Darya Trepova, e cila u arrestua në këtë rast, dhe “njerëz të tjerë të pafajshëm”.
Në gusht 2022, Ilya Ponomaryov raportoi se Ushtria Republikane Kombëtare ishte gjithashtu pas vrasjes së Darya Dugina, vajzës së propagandistit famëkeq rus Alexander Dugin, autorit të konceptit “Bota Ruse”.
Para deklaratës së tij, në internet nuk përmendej kjo organizatë.
Më 2 prill 2023, ditën e vdekjes së Vladlen Tatarskit, ish-deputeti i Dumës la të kuptohej në media se i njihte vrasësit e “novatorit të kohës së luftës”, por ai ende pret qëndrimin zyrtar të grupit që kreu këtë veprim. /FolDrejt/
