Guvernatori i Luhanskut, Serhiy Haidai tha se trupat ukrainase janë urdhëruar të largohen nga Severodonetsk për ta parandaluar rrethimin
Pas luftimeve të ashpra disa javore, forcat ukrainase do të tërhiqen nga qyteti i shkatërruar në lindje të vendit për të shmangur rrethimin, deklaroi sot guvernatori rajonal, Serhiy Haidai, shkruan AA, transmeton Fol Drejt.
Qyteti Severodonetsk, qendra administrative e rajonit Luhansk, është përballur me bombardimet e pamëshirshme ruse. Trupat ukrainase luftuan me rusët në beteja shtëpi më shtëpi përpara se të tërhiqeshin në një fabrikë të madhe kimike pranë qytetit, ku u zhytën në strukturat e tij të mëdha nëntokësore.
Ditët e fundit, forcat ruse kanë arritur të përparojnë rreth Severodonetsut dhe qytetit fqinj Lysychansk, në përpjekje për të rrethuar forcat ukrainase.
Guvernatori i Luhanskut, Serhiy Haidai tha se trupat ukrainase janë urdhëruar të largohen nga Severodonetsk për ta parandaluar rrethimin.
“Ne jemi detyruar të tërheqim djemtë tanë. Nuk ka kuptim të qëndrosh në pozicionet e shkatërruara, sepse numri i viktimave në zonat e fortifikuara dobët do të rritet çdo ditë”, tha ai.
Haidai tha se forcat ukrainase “kanë marrë urdhër të tërhiqen në pozicione të reja dhe të vazhdojnë luftimet atje”, por nuk dha detaje të mëtejshme.
Ai tha se rusët po përparonin gjithashtu drejt Lysychansk nga Zolote dhe Toshkivka, duke shtuar se njësitë ruse të zbulimit kryen sulme në skajet e qytetit, por u dëbuan nga forcat mbrojtëse.
Guvernatori shtoi se ura në autostradën që të çon në Lysychansk u dëmtua rëndë në një sulm ajror rus dhe u bë e papërdorshme për kamionët. Pretendimi nuk mund të verifikohej në mënyrë të pavarur.
Ministria ruse e Mbrojtjes deklaroi sot se katër batalione ukrainase dhe një njësi e “mercenarëve të huaj” me rreth 2.000 ushtarë janë “bllokuar plotësisht” pranë Hirske dhe Zolote, në jug të Lysychansk-ut.
Pas një përpjekjeje të dështuar për pushtimin e Kievit, kryeqytetin e Ukrainës, në fazën e hershme të pushtimit që filloi më 24 shkurt, forcat ruse e kanë zhvendosur fokusin në rajonin e Donbasit, ku forcat ukrainase kanë luftuar me separatistët e mbështetur nga Moska që nga viti 2014.
Ushtria ruse kontrollon rreth 95 për qind të provincës Luhansk dhe rreth gjysmën e provincës fqinje Donetsk, dy zonat që përbëjnë Donbasin./FolDrejt/
