Ai po vizitonte Karakasin dhe vdiq në moshën 60-vjeçare nga një atak në zemër.
Camilo Guevara Martz, djali i guerrilasit revolucionar me origjinë argjentinase, Ernesto Che Guevara, vdiq të hënën në Karakas në moshën 60-vjeçare nga një atak në zemër, njoftoi sot presidenti kuban Miguel Diaz-Canel.
“Me keqardhje të thellë, i themi lamtumirë Camilo-s, djalit të Che-së dhe një njeriu që promovoi idetë e tij” (Che), njoftoi presidenti në llogarinë e tij në Twitter.
Sipas agjencisë kubane të lajmeve Prensa latina, Camilo Guevara March ishte duke vizituar Karakasin kur pësoi një “emboli pulmonare që shkaktoi një atak në zemër”.
I lindur në vitin 1962, Camilo ishte më i madhi nga katër fëmijët e guerilasit kubano-argjentinas Ernesto Che Guevara, i vrarë nga ushtria boliviane në vitin 1967, dhe gruas së tij kubaneze Aleida Martz, gjithashtu një guerile.
Nga kjo martesë lindën edhe tre fëmijë të tjerë: Aleida, Celia dhe Ernesto.
“Che” kishte një vajzë tjetër (Ilda e cila vdiq në 1995) nga një martesë e mëparshme me peruanen Ilda Gadea.
Me një diplomë në të Drejtën e Punës, Camilo Guevara March ishte drejtor i Qendrës së Studimeve Che Guevara në Havana, një institucion i përkushtuar për të përjetësuar punën dhe mendimin e babait të tij.
