Pas dënimit që Gjykata ia caktoi Shaban Gogajt me 7 vjet e 6 muaj burg për vrasjen e Agonis Tetajt, ka reaguar ministrja e Drejtësisë, Albulena Haxhiu, e cila këtë vendim e ka cilësuar si skandaloz dhe të padrejtë.
Në një postim në facebook, Haxhiu ka thënë se aktgjykimi i sotëm mund të jetë gjithçka tjetër, vetëm drejtësi jo, transmeton Fol Drejt.
“Procesi gjyqësor ndaj personit të dyshuar është zhvilluar me shumë probleme dhe është karakterizuar me shumë çështje që e kanë penguar një proces të drejtë dhe efikas.” – ka thënë Haxhiu.
“Si ministre e Drejtësisë nuk kam mandat e as intencë për të ndërhyrë në asnjë rast gjyqësor, mirëpo është e domosdoshme të theksohet se sikur opinioni publik, jam e shqetësuar me mënyrën e administrimit të këtij procesi, përfshirë këtu edhe shkallën e dënimit me aktgjykimin e sotëm. Është vendim i padrejtë e skandaloz!
Shteti i së drejtës kërkon vendosmëri të personave që ushtrojnë detyrën zyrtare në organet që janë bartëse të sistemit të drejtësisë. Pra, kemi nevojë për prokurorë të ndershëm e profesionistë që me precizitet hetojnë rastet dhe po ashtu gjyqtarë që marrin vendime brenda suazave të ligjshmërisë dhe në përputhje me provat e faktueshme të rastit.” – ka shtuar ajo.
Tutje, ajo ka kërkuar që të merren në konsideratë të gjitha rrugët ligjore për rastin e vrasjes së të ndjerit, Agonis Tetaj, në mënyrë që të vendoset ligjshmëria e plotë dhe të jepen vendime meritore./FolDrejt/
