“Kjo është shumë e keqe për rusët, sepse me shumë gjasë marrja e vizave do të jetë më e gjatë dhe më e vështirë”, tha zëdhënësi i Kremlinit, Peskov.
Zëdhënësi i Kremlinit, Dmitry Peskov ka reaguar ndaj njoftimit të Bashkimit Evropian (BE) për pezullimin e marrëveshjes për lehtësimin e vizave ndaj Rusisë duke thënë se “Kjo është shumë e keqe për rusët, sepse marrja e vizave do të jetë më e gjatë dhe më e vështirë”, shkruan AA, transmeton Fol Drejt.
Në një deklaratë për gazetarët në Moskë, Peskov akuzoi Evropën për shkak të problemeve lidhur me tubacionin e gazit natyror “Rrjedha Veriore”. “Gazprom është i gatshëm dhe ka dëshirë të përmbushë përgjegjësitë e tij. Por, në situatën aktuale, pala evropiane ka vendosur pengesa ligjore dhe teknologjike që pengojnë Gazprom-in të punojë”, tha ai.
Duke i bërë thirrje për sens të përbashkët palëve që punojnë me Gazprom-in, Peskov tha: “Ky është një skenar krize. Dua t’i bëj thirrje për sens të përbashkët palëve që punojnë me Gazprom-in, por aktualisht mund të arrijmë në rezultatin se kanë mungesë serioze të sensit të përbashkët”.
– Reagimi i Rusisë ndaj hapit të BE-së për vizat
Lidhur me njoftimin e BE-së se do të pezullojë marrëveshjen e nënshkruar në vitin 2007 me Rusinë për lehtësimin e vizave, Peskov tha se “Kjo është shumë e keqe për rusët, sepse me shumë gjasë marrja e vizave do të jetë më e gjatë dhe më e vështirë. Ky hap është një vendim tjetër qesharak në serinë e marrëzive që vazhdojnë. Sigurisht që tërheqja nga kjo marrëveshje do të vështirësojë situatën edhe për evropianët”.
Gjithashtu edhe zëdhënësja e Ministrisë së Jashtme të Rusisë, Maria Zakharova ka reaguar ndaj njoftimit nga BE-ja për pezullimin e marrëveshjes për lehtësimin e vizave me Rusinë.
“Vendet anti-ruse të BE-së kanë marrë vendim që të ‘ndëshkojnë’ qytetarët rusë sepse mbështesin politikat e jashtme të pavarura të shtetit të tyre”, tha Zakharova e cila shtoi se pas këtij vendimi vërehen përpjekjet për të përçarë shoqërinë ruse të cilat nuk mund të vlerësohen aspak ndryshe nga një ndërhyrje e hapur në punët e brendshme të një vendi tjetër.
Ajo theksoi se në këtë mënyrë BE-ja ka vërtetuar edhe një herë objektivat e vërteta të politikave të saj. “Tashmë është e qartë për të gjithë se nuk kanë asnjë lidhje me realitetin deklaratat që janë bërë vitet e fundit se politika e sanksioneve të BE-së nuk është kundër qytetarëve të zakonshëm rusë. Nuk do të jemi si BE-ja në politikën e saj të paarsyeshme për të ‘djegur urat’ mes njerëzve, por në të njëjtën kohë ruajmë të drejtën për të mbrojtur interesat e qytetarëve tanë dhe për t‘u kundërpërgjigjur për të garantuar sigurinë tonë kombëtare”, tha Zakharova./FolDrejt/
