Tajvani akuzon Kinën për “shantazhim” të Katarit për të ndryshuar emrin e tij në portalin online të vizave
Tajvani ka akuzuar Kinën për “shantazhim” të Katarit për të ndryshuar përsëri emrin e ishullit të vetëqeverisur, ndërsa shteti i Gjirit po përgatitet për fillimin e Kupës së Botës FIFA 2022, shkruan AA, transmeton Fol Drejt.
“Turp për Kinën autoritare që shantazhoi organizatorët e (FIFA) 2022 Katarin për të fshirë Tajvanin demokratik dhe për të shënuar autogol. Turp!” postoi Ministria e Jashtme e Tajvanit sot.
Grindjet lidhur me emrin filluan kur Katari identifikoi Tajvanin në portalin e tij online të vizave për Kupën e Botës si “Tajvani, Provinca e Kinës”.
Me kërkesë nga Taipeit, emri u ndryshua në Tajvan duke shkaktuar një reagim të fortë nga Kina, e cila e konsideron ishullin provincën e saj të shkëputur. Tajvani insiston në pavarësinë e tij që nga viti 1949, duke lidhur marrëdhënie të plota diplomatike me të paktën 14 vende.
Ndërsa polemika vazhdonte, Doha e ndryshoi shënimin në “Taipei Kinez”.
Pekini vlerësoi ndryshimin e emrit dhe angazhimin e Dohas ndaj parimit Një Kinë.
“Tajvani është pjesë e Kinës. Parimi i një Kine është një normë bazë që rregullon marrëdhëniet ndërkombëtare dhe konsensusin e përbashkët të komunitetit ndërkombëtar”, tha të hënën Wang Wenbin, zëdhënës i Ministrisë së Jashtme të Kinës.
Katari, si shumica e vendeve anëtare të OKB-së, nuk ka marrëdhënie diplomatike me Tajvanin, vendin e mbi 24 milionë banorëve.
Për herë të parë Botërori i ardhshëm i FIFA-s mbahet në dimër dhe në një shtet të Gjirit./FolDrejt/
