Bursa Shqiptare e Energjisë, e cila i bashkon tregjet e Shqipërisë dhe Kosovës, e ka nisur sot operimin, shkruan Fol Drejt.
Në një ceremoni të veçantë të organizuar për këtë rast, zëvendëskryeministrja Belinda Balluku, njëherësh ministre e Infrastrukturës dhe Energjisë e cilësoi si një hap të rëndësishëm për sektorin elektro-energjetik shqiptar.
“Shqipëria është në një nga pozitat më të mira në rajon sa i përket strategjisë energjetike dhe zhvillimit që do t’i japim vendit për të arritur objektivin për të qenë një vend eksportues neto energjie në vitin 2030. Ka qenë një rrugë e vështirë për të dizenjuar këtë strategji dhe për ta bërë atë koherente. Diversifikimi i burimeve të rinovueshme është synimi kryesor, por nuk harrojmë faktin se qëndrueshmëria dhe siguria energjetike mbeten kryesoret”, tha ajo.
Balluku vuri në dukje se, viti 2022 shënoi nevojë ekstreme të të pasurit të një burse për Shqipërinë dhe Kosovën. Sipas saj, kjo ka ardhur si rrjedhojë e një pune intensive 5 vjeçare.
“Sot lançojmë ankandin e parë të ALPX-të të ditës në avancë, duke krijuar kështu një mundësi që brenda 12 muajve të kemi edhe tre ankande ditore të intraday duke kompletuar këtë proces”, tha Balluku.
ALPEX është bursa e dytë operacionale në gjashtë vendet e Ballkanit Perëndimor dhe vjen si një domosdoshmëri për të garantuar transparencë, konkurencë dhe përdorim efikas të kapaciteteve.
Në ceremoni ka qenë e pranishme edhe Ministrja Artane Rizvanolli, e cila e ka vlerësuar lart këtë bursë./FolDrejt/
