Kuvendi i Republikës së Kosovës dje ka qenë arenë e përplasjeve ndërmjet opozitës dhe pozitës, për çështjen e dialogut me Serbinë, ku i pranishëm ishte edhe Kryeministri Albin Kurti shkruan Fol Drejt.
Debati përfundoi vonë, pas orës 2 e mëngjesit, ndërsa në fokus ishte Propozimin evropian për normalizimin e marrëdhënieve ndërmjet Kosovës dhe Serbisë.
Kritikat e opozitës theksonin “degradimin” e dialogut, duke thënë se debati është zhvendosur nga synimi për “njohje në qendër” me “zajednicën në qendër!”
“Unë do ta përfundoj fjalinë time me një fjali të kryeministrit që më pat lënë shumë përshtypje dhe më pati pëlqyer shumë ‘Çakorri, Çakorri, Zhlepi, Zhlepi, tap kryeministër tha e lëshoi bajrakun! E unë po ju them sot në gjuhën e tij: Zajednica, Zajednica, Zajednica, tap kryeministër e lëshoi bajrakun!” – tha me ironi deputeti i LDK-së Driton Selmanaj, duke ia shfrytëzuar të njëjtin leksik që Kryeministri Albin Kurti e kishte përdorur kundër ish kryeministrit Ramush Haradinaj, për çështjen e demarkacionit.
Por Kryeministri Kurti ua ktheu duke thënë se edhe nëse ka ndryshuar, ka ndryshuar për të mirë:
“Unë nuk kam ndryshuar përmbajtësisht për keq, por ju keni ndryshuar. Pra, e kuptoni, bëhet fjalë për deputetë që e kanë votuar ‘Zajednicën’ më 2013… Nuk kam ndryshuar unë, por ju po këqyrni ndryshe tash. Konteksti, qëllimi, kuptimi nuk kanë ndryshuar” – tha ndër të tjera kryeministri, duke shtuar “Zajednica nuk kalon!”
Ndër radhët e opozitës, përkatësisht PDK-së, ishte edhe ish diplomati Enver Hoxhaj i cili tha se në marrëveshjen e fundit, Kurti pranoi me shkrim dhe me gojë se statusi i Kosovës mbetet çështje e hapur.
“Asnjë grup negociator i Kosovës në këto 15 vitet e fundit nuk ka pranuar me shkrim apo gojë që statusi i Kosovës është çështje e hapur. Kurti pranoi neutralitetin e statusit të Kosovës”, tha ai.
Debati u karakterizua herë, herë me tone të ashpra, ndërsa Kryetari i Kuvendit Glauk Konjufca e ndërhyri në një moment kur i kërkoi deputetit Jahja Kokaj të flas me terma më të lehta:
“Profesor nëse mundesh në terma më të lehtë se pak vonë, deputetët po më ankohen” – tha Konjufca, pasi Kokaj duke u shprehur për Asociacionin tha se “…kur e hedh budallai një gur në ujë, 1 mijë të mençur nuk mund ta nxjerrin”.
Ferat Shala nga PDK reagoi kur kryeministri ia përmendi emrin gruas së tij, duke ia kujtuar se “gruaja ime e dashur, e dashura ime Sala, nuk e ka votuar zajednicën, dhe nuk është e ndershme me fole për personat që nuk janë këtu, dhe nuk na ka hije me fole për gratë” – ka thënë ai.
Më i ashpër në kritikat e tij ishte i pari i LDK-së Lumir Abdixhiku i cili ndër të tjera tha se:
“Njeriu i cili e ka kërkuar njohjen në qendër dhe e përfunduar me neutralitet rreth paragjykimit të statusit të shtetit të vetë, njeriu që i ka pasur gjashtë kushte para gjashtë muajsh dhe ka përfunduar pa asnjërin prej tyre”.
Ai i ka thënë kryeministrit se ka mbetur i vetëm në këtë ballafaqim, meqë ka qenë përherë përçarës. “Kur ballafaqoheni me Vuçiqin në Bruksel, mendjen e ki te opozita, sepse je popullist!”
“Nuk konsideroj që kam ndryshuar ose kemi ndryshuar si Lëvizje Vetëvendosje!, as në koncept, as në qëllim, as në kuptim, a në strategji po!” – ka thënë ai. Por për sa i përket dialogut, ai ua ka kujtuar marrëveshjen e VLAN-it të shtatorit 2014, ku prej atëherë “nuk thuhej lehtë jo negociata, Vetëvendosje!”
Ai ka thënë se propozimet nga bashkësia ndërkombëtarë kanë ardhur shumë më të mira, për arsye të shumë faktorëve.
“Dialogu nuk është prioriteti numër një, por kjo marrëveshje është shumë e rëndësishme!” – ka thënë mes tjerash Kurti, duke shtuar se ajo do t’ia hapë mundësinë Kosovës për zhvillim edhe ekonomik./FolDrejt/
