Ushtria Shqiptare, ka kryer me sukses Stërvitjet “Biza ‘22”, raporton Fol Drejt.
Ministri i Mbrojtjes Niko Peleshi ka njoftuar sot për përfundimin me sukses të stërvitjes së Forcave të Armatosura të Shqipërisë.
Sipas tij, kjo është një prej arritjeve më domethënëse të Forcave të Armatosura, certifikimin e Grup Batalionit të Këmbësorisë së Lehtë sipas standardeve të NATO-s.
“Rritja e nivelit të gatishmërisë së Aleancës, imediate në realitetin e ri të sigurisë. Sfida e radhës “Defender 2023”. Mirënjohje aleatit tonë strategjik, SHBA”, është shprehur ministri.
Sipas njoftimit për shtyp të Ministrisë së Mbrojtjes, Peleshi, i shoqëruar nga shefi i Shtabit të Përgjithshëm të Forcave të Armatosura, gjeneral brigade Arben Kingji, gjatë fjalës së tij, shprehu vlerësimet dhe mirënjohjen për të gjithë ata që kontribuan në realizimin me sukses të kësaj stërvitjeje, që siç tha ai, konsiderohet si një prej arritjeve më domethënëse të Forcave të Armatosura, Certifikimit të Grup – Batalionit të Këmbësorisë së Lehtë sipas standardeve të NATO.
Kërkesa e Aleancës për certifikimin dhe rritjen e nivelit të gatishmërisë të forcave të saj, bëhet edhe më ‘imediate’ sot në realitetin e ri të sigurisë, të cenuar rëndë pas agresionit ushtarak të Rusisë ndaj Ukrainës. Mbrojtja e territoreve të Aleancës është detyra parësore e jona dhe aleatëve tanë, një detyrë të cilën, nuk na lejohet të mos e përmbushim”, u shpreh ministri Peleshi, ndërsa falënderoi aleatin strategjik, SHBA për mbështetjen.
Po ashtu ai tha se: “puna e palodhur e disa ekipeve të Gardës së New Jersey, por edhe atashimi pranë GBKL të një strukture speciale amerikane, Special Force Assistance Brigade (SFAB), bën të mundur realizimin e objektivit tonë në një kohë pothuaj rekord”. /FolDrejt/
