As buxheti për Forcën e Sigurisë së Kosovës (FSK), më i larti i ndarë ndonjëherë në historinë e re të republikës, nuk duket i mjaftueshëm përball forcimit të vazhdueshëm të ushtrisë serbe. Vetë Kryeministri Albin Kurti, nuk ka hezituar ta përsëris se fqinji ynë verior ka prirje destabilizuese jo vetëm në raport me Kosovën, por edhe me Ballkanin, shkruan Fol Drejt.
Pak ditë më parë, ndërsa qëndroi për një vizitë në Gjermani, Kryeministri Kurti tha për DW se, megjithëse Kosova e ndien veten të sigurt, kjo nuk do të thotë se ajo nuk është vigjilente karshi zhvillimeve në Serbi.
“U dëshmua që lufta hibride nuk e zëvendëson luftën, por e përgatit atë, dhe, në anën tjetër, gjithashtu u dëshmua që vendet autokratike, kur blejnë armatim, këtë nuk e bëjnë për parada ceremoniale ushtarake, por e bëjnë pikërisht, për ta përdorur atë armatim në luftën agresore kundër fqinjëve” – u shpreh ai ndër të tjera.
I pyetur nëse “lufta hibride” mund të kthehet në një luftë reale, ai shtoi se:
“…jemi shumë të kujdeshëm, e shumë vigjilentë, po e ndjekim se çfarë ndodh atje, afër tre për qind e brutoproduktit vendor bëhet për investime dhe shpenzime për ushtri, me ç’rast blejnë armatim, ose marrin donacione nga Rusia, Bjellorusia dhe Kina, dhe rrotull kufirit të Kosovës me Serbinë, tashmë janë 48 baza ushtarake, të cilat e rrezikojnë sigurinë dhe paqen në vendin tonë”.
Ditë më parë, edhe Ministri i Mbrojtjes Armend Mehaj raportoi para Komisionit Parlamentar për Siguri. Ministri Mehaj ndër të tjera foli rreth buxhetit si dhe planeve për ngritjen e kapaciteteve të FSK-së.
Qeveria aktuale ka ndarë një buxhet prej 102.3 MIL € për FSK-në, i cili është më i larti në historinë e re të Kosovës, me të cilin synohet jo vetëm shtimi i kapaciteteve ushtarake, rekrutimi i kadetëve të rinj, por edhe blerja e armatimit.
“Fuqizimi i Forcës së Sigurisë së Kosovës është misioni im, andaj dhe kemi investuar në blerjen e pajisjeve ushtarake të cilat sigurojnë modernizimin e FSK-së. Blerjet janë të cekura në Planin tonë të prokurimit si dhe në raportin me shkrim të cilin e kam dërguar.
Blerjet janë duke u realizuar nga programi amerikan “FMS”, siç është rasti me blerjen e dronëve në vlerë prej 4,500.000 €, ndërsa po ashtu jemi duke pranuar donacione nga programi “FMF”” – tha para komisionit ministri Mehaj.
Ministri Mehaj po ashtu ka përmendur edhe pranimin e 840 rekrutëve të rinj, në kuadër të planeve dhe aktiviteteve të implementuara të ministrisë.
Megjithatë, për njohësit e rrethanave politike në Ballkan, qeveria aktuale nuk duhet t’i neglizhojë zhvillimet në Serbi. Ndonëse rreziku është i vogël, për shkak të pranisë së trupave të NATO-s në Kosovë, kjo nuk do të thotë që Kosova të mos bëjë përpjekje t’i ngritur kapacitetet e saj ushtarake.
Gazetari Pleurat Salihu tha për Fol Drejt se “Qeveria e Kosovës do të duhej që në rishikimin e buxhetit në 6 mujorin e parë të rris buxhetin për Forcën e Sigurisë së Kosovës, së paku 200 për qind. Po ashtu do të ishte mirë që të mendohet si opsion që 2 ose 3 për qind e tatimit të shkoj për FSK-në, apo të bëhet një Fond ku mërgimtarët do të kontribuonin aty dhe me flet dëshmi më pas të lirohen në doganë kur të fusin mallra, ose në fatura çoftë të energjisë, mbeturinave, ujit, apo blerjen e mallrave.”
Për kontekstin e brishtë ballkanik dhe mundësitë reale të shpërthimit të ndonjë konflikti të ri, ka folur edhe Korab Blakaj. Në një opinion të dërguar në adresë të Fol Drejt, Blakaj si një njohës i shkëlqyer i politikave dhe situatës në Ballkanin Perëndimor, ka vënë theksin te ndryshimi i kontekstit politik pas shpërthimit të luftës në Ukrainë:
“Për shkak të situatës në Ukrainë, mund të ndodhë humbja e mbështetjes ruse për Serbinë. Në këto kushte, Serbia mund të jetë e interesuar të bëj pazar në rastin e trajtimit të Krimesë në një plan me pavarësimin e Kosovës. Serbia po e ndjen braktisjen nga Rusia dhe ky mund të jetë një qëllim i saj për t’u forcuar ushtarakisht, duke synuar mbi Kosovën pjesën veriore të saj. Një arsye më shumë pse shteti i Kosovës duhet të garantojë sovranitetin e kufijve të tij, përfshi dhe veriun e Ibrit.”
Sipas GlobalfirePower, Serbia, për kah forca ushtarake renditet e 61-ta, ndërsa Kosova e 140-ta. Ndërsa Serbia ka 25 mijë personel ushtarakë aktivë, Kosova ka 3500 të tillë.
Serbia po ashtu është superiore edhe në planin e armatimit: Serbia ka mbi 300 tanke; mbi 400 mjete të rënda artilerie; mbi 100 avionë luftarakë; 51 helikopterë, 16 dronë ndërsa Kosova 0. Me një fjalë, në shumë parametra, forca ushtarake e Kosovës, del të jetë në disproporcion të thellë me atë serbe.
Duke iu referuar këtyre raporteve, gazetari Salihu po ashtu tha se, institucionet e Kosovës nuk duhet të kursejnë në planin e forcimit të ushtrisë. Megjithatë, ai vuri në dukje mundësinë e problemeve që mund t’u shfaqen institucioneve, për shkak të statusit të shtetit.
Të dy, sikurse Blakaj ashtu edhe Salihu, propozojnë një varg iniciativash për forcimin e ushtrisë së Kosovës, një ndër faktorët garantues për sigurinë dhe stabilitetin e vendit.
“Armatosja e Serbisë bëhet ekskluzivisht vetëm për ta marrë primatin e shtetit më të fuqishëm në Bllkanin Perëndimor, dhe kryesisht për ta mbajtur në tension Kosovën dhe Bosnjën. Serbia e dinë mirë që nuk guxon të marrë invazion në shtetin tonë dhe atë boshnjak por tenton ta luaj lojën e të fortit” – u shpreh Salihu.
I një mendje është edhe Blakaj, i cili madje investimet në fushën e sigurisë, forcimin e FSK-së në të gjitha kapacitetet e saj, e sheh madje si një nevojë emergjente. Ata sikur i besojnë urtisë popullore se “uji fle, por armiku nuk fle!”./FolDrejt/
https://www.youtube.com/watch?v=6Vi-o6fba4w&ab_channel=MilitaryComparison1M
