Presidenti i Serbisë, Aleksandar Vuçiq, pas protestave masive të së shtunës që u organizuan në Beograd, Novi Sad, Nish dhe Kragujevc, rreth orës 10:00 ka mbajtur një fjalim të jashtëzakonshëm. Megjithatë, në fjalën e tij ndonëse iu referua tubimeve protestuese, më së shumti foli për Kosovën e pak më pak për vërshimet në Serbi, shkruan index.hr, transmeton Fol Drejt.
“Për shumë vite jam përpjekur të ruaj paqen, stabilitetin dhe progresin ekonomik në çdo mënyrë të mundshme. Vendi ynë ka dhënë gjithçka për ta bërë këtë. I pëlqen dikujt apo jo, këto janë fakte dhe të dhëna. Pavarësisht se si Ne mundohemi të jemi partner serioz dhe të përgjegjshëm, jemi në rrugën evropiane, por ata kurrë nuk na kanë parë kështu, nëse nuk i kemi jetësuar kërkesat e tyre pa kushte dhe pa diskutim, kemi qenë fajtorë. E shihni, nuk kemi rrugëdalje…” – citohet të ketë thënë Vuçiq.
Ai ka akuzuar Kryeministrin e Republikës së Kosovës duke thënë se ai po ndërton “një situatë kriminale.”
Vuçiq tha gjithashtu se “Zyra për Kosovë dhe Metohi e ka marrë në dorë dokumentin e EULEX-it”. “A e dini se çfarë thonë? Epo, asgjë. Na kanë shkruar atë që është shkruar në katër nene të të ashtuquajturave ligje të Prishtinës dhe nuk e kanë idenë. Ata kanë ndjekur formën burokratike. Vërtet nuk iu interesojnë serbët”, ka vijuar Vuçiq.
Në fjalimin e tij dëshpërues, nuk ka harruar t’i përmend edhe të arrestuarit serbë e involvuar në incidente kriminale në veri të Kosovës:
“Ata arrestuan Spasiqin dhe Vlashkoviqin për një sulm të supozuar ndaj gazetarëve. Shikoni se çfarë po bënë – Kurti po krijon një situatë kriminale në të cilën ai keqtrajton të gjithë qytetarët e kombësisë serbe. Mendova se po e bënte i vetëm, tani e di që e ka përkrahjen e disa shteteve perëndimore po sjell disa idiotë që nuk bëjnë asgjë që nuk kanë legjitimitet me 1 për qind në Leposaviq. Ata sjellin një grup gazetarësh të tyre për të provokuar njerëzit atje.”
Për më tepër Vuçiq i ka quajtur Kryeministrin Kurti dhe Ministrin e Punëve të Brendshme Xhelal Sveçla kriminelë.
Këto akuza të rënda ai i ndërlidhi me rastet e fundit të arrestimeve:
“Lidhur me arrestimin e fundit të Milun Milenkovic Lunet në veri të Kosovës, Kryeministri i Kosovës Albin Kurti dhe ministri i Brendshëm Xhelal Sveçla thonë se ai është kriminel, ti je kriminel babë! Edhe ti Kurti dhe ti Sveçla. Turp të keni!”.
Ai ka thënë se ditëve të fundit ka qenë nën një presion të jashtëzakonshëm, pas kidnapimit të policëve kosovarë. Për fjalimin e tij, i cili u karakterizua nga një gjuhë kaq vulgare, kanë shkruar mediat nga i gjithë rajoni./FolDrejt/
