Kryeministri hungarez Viktor Orbán i bëri thirrje Bashkimit Evropian që të formojë një organ sigurie si NATO, por pa Shtetet e Bashkuara të Amerikës.
“NATO-ja evropiane do të ishte një zgjidhje. Unë e propozova tashmë në vitin 2012”, tha Orban në një intervistë për të përjavshmen zvicerane Die Weltwoche, duke shtuar se vendet evropiane duhet të jenë të gatshme të mbrohen.
“SHBA dhe BE paguajnë çmime të ndryshme për luftën dhe amerikanët, jo evropianët, e kanë fjalën e fundit në vendime,” shtoi ai.
Në të njëjtën intervistë, Orban arriti në përfundimin se Moska mund të ketë vështirësi në dy ose tre vitet e ardhshme. Por, shtoi ai, “situata do të ndryshojë për mirë sepse rusët dinë të mësojnë dhe të përshtaten me vështirësitë dhe nuk duhet të nënvlerësohen”. Mediat ruse i raportuan me entuziazëm këto deklarata të Orbanit.
Një nga aleatët e rrallë të Putinit në Evropë
Orban, përndryshe një nga aleatët e paktë të Putinit në Evropë, tha në një fjalim të fundit për publikun se Evropa po zhytet në luftë.
“Ju të gjithë e shihni se ata duan të na tërheqin në luftë dhe duan që ne të bashkohemi me vendet pro luftës,” tha ai.
Ai përsëriti se vendi i tij duhet të durojë çdo ditë provokime.
“Unë ju kërkoj që të mos bini në provokime dhe ne duhet t’i përmbahemi interesave të Hungarisë në arenën politike,” shtoi ai.
Ai tha se kishte edhe nga ata që donin të dërgonin ushtrinë në Ukrainë. Ai theksoi se në zgjedhjet e prillit të vitit të kaluar, të cilat u konfirmuan nga sondazhi publik i qeverisë, hungarezët vendosën që Hungaria të “qëndrojë jashtë luftës” dhe të mos furnizojë me armë.
Ai e quajti të rëndësishëm planin e paqes të Kinës, duke shtuar se Hungaria e mbështet atë. Ai theksoi se vendet si Hungaria, të cilat duhet të importojnë pjesën më të madhe të energjisë së tyre, janë veçanërisht të “torturuara nga inflacioni”. /FolDrejt/
