Raportuesja për Kosovën në Parlamentin Evropian, Viola von Cramon, ka deklaruar se pala që refuzon marrëveshjen franko-gjermane në negociatat ndërmjet Beogradit dhe Prishtinës do të jetë e izoluar ndërkombëtarisht, shkruan Klix, përcjell Fol Drejt.
Politikanja gjermane tha se për dështimin do të fajësohet pala që e refuzon marrëveshjen dhe shtoi se këtë e dinë mirë presidenti serb Aleksandër Vuçiq dhe kryeministri i Kosovës Albin Kurti.
“Kjo mund të çojë në përkeqësimin e marrëdhënieve me Bashkimin Evropian dhe ndalimin e disa proceseve të rëndësishme,” tha von Cramon.
Ajo shtoi se të dy liderët duhet të përdorin mbështetjen e madhe politike që kanë në Bruksel për të arritur një kompromis.
Duke folur për çështjen e formimit të Bashkësisë së Komunave Serbe, ajo tha se tani ka njerëz që thonë se Asociacioni nuk mund të pranohet në Kosovë sepse do të jetë një Republikë Sërpska tjetër.
“Ky nuk është domosdoshmërisht rasti. Ka shumë modele të autonomisë në botë. Republika Sërpska është një version, por askush nuk po propozon të njëjtën gjë në Kosovë,” tha von Cramon, duke shtuar se “përpjekjet për të përshkruar Asociacionin si një tjetër Republika Sërpska pengojnë përpjekjet për të zgjidhur këtë problem serioz”.
Ajo tha se qëndrimi parimor i BE-së është që të gjitha marrëveshjet e nënshkruara më parë duhet të zbatohen, përfshirë Asociacionin. /FolDrejt/
