Me datën 5 shtator 2022, në Republikën e Kosovës do të qëndrojë për vizitë Kryeministrja e Serbisë znj. Ana Brnabiq, së bashku me një delegacion shoqërues, raporton Fol Drejt.
Policia e Kosovës, përgjatë vizitës së Brnabiq, e cila realizohet në Mitrovicën e Veriut, do të kujdeset për ofrimin e sigurisë dhe mirëmbajtjen e rendit e qetësisë publike.
Kështu ka bërë të ditur Zyra për Informim dhe Marrëdhënie me Publikun e PK-së.
“Për të mundësuar qarkullim të lirë të eskortës zyrtare nën përcjellje dhe sigurim sipas itinerarit të lëvizjes, Policia e Kosovës do të bëjë ndërprerje të përkohshme të qarkullimit të trafikut (në intervale të shkurta kohore), të disa segmenteve rrugore ku pritet të kalojë eskorta, si dhe në lokacione të caktuara ku parashihen të realizohen aktivitete.
Njëkohësisht për të mundësuar qarkullimin dhe riorientimin e trafikut në rrugë alternative në lokacionet ku pritet të kalojë eskorta do të angazhohen zyrtarë policorë të njësiteve relevante, andaj Policia e Kosovës kërkon mirëkuptim të plotë nga ana e qytetarëve dhe pjesëmarrësve në trafik” – thuhet në komunikatëne e PK-së./FolDrejt/
