Presidentja e Komisionit Evropian, Ursula Von der Leyen, tha se Bashkimi Evropian do të organizojë një konferencë për të treguar rëndësinë e çështjes së fëmijëve nga Ukraina, të cilët u rrëmbyen nga Rusia, raporton Klix, përcjell Fol Drejt.
“Është një kujtim i tmerrshëm i periudhës më të errët të historisë sonë, i dëbimeve të fëmijëve që ndodhin atje. Ne e dimë se 16,200 fëmijë u deportuan, vetëm 300 prej tyre u kthyen. Është një krim lufte,” tha Von der Leyen në Brukseli.
Ajo deklaroi se kryeministri polak Mateusz Morawiecki dhe ajo nisën një iniciativë për riatdhesimin e fëmijëve të rrëmbyer nga Rusia.
“Për këtë qëllim, ne do të organizojmë një konferencë. Ne duam të ushtrojmë presion ndërkombëtar për të marrë të gjitha masat e mundshme për gjetjen e këtyre fëmijëve,” tha ajo në fund të ditës së parë të samitit dyditor të 27 vendeve anëtare të Unionit.
Në një takim pranveror që filloi me një drekë pune me Sekretarin e Përgjithshëm të OKB-së Antonio Guterres mbi sfidat kryesore gjeopolitike dhe globale, liderët e vendeve anëtare të BE-së mbështetën vendimin për të dërguar urgjentisht një milion predha artilerie në Ukrainë përmes prokurimit të përbashkët.
Kujtojmë se Gjykata Ndërkombëtare Penale lëshoi një urdhër arresti për Putinin dhe Komisioneren e Presidentit rus për të Drejtat e Fëmijëve Maria Alekseevna Lvova-Belova.
Në deklaratën e Gjykatës Ndërkombëtare Penale (ICC) thuhet se ka arsye të qëndrueshme për të besuar se lideri rus mban përgjegjësi penale për krimin e luftës të dëbimit të paligjshëm të popullsisë (fëmijëve) dhe transferimit të paligjshëm të popullsisë (fëmijëve) nga vendet e okupuara në territoret e Ukrainës në Federatën Ruse.
Gjithashtu thuhet se ka arsye të qëndrueshme për të besuar se Marija Lvova-Belova mban përgjegjësi penale individuale për krimin e luftës të dëbimit të paligjshëm të popullsisë (fëmijëve) dhe zhvendosjen e paligjshme të popullsisë (fëmijëve) nga territoret e okupuara të Ukrainës në Federata Ruse.
Ju kujtojmë se Federata Ruse, nën komandën e Putinit, nisi një agresion të hapur kundër Ukrainës më shumë se një vit më parë, pavarësisht thirrjeve nga pothuajse e gjithë bota për Moskën për t’i dhënë fund armiqësive. Për shkak të kësaj, Rusia është nën sanksione të forta ekonomike nga Perëndimi. /FolDrejt/
