Paketa e dhjetë e sanksioneve të BE-së do të synojë jo vetëm liderët politikë dhe ushtarakë rusë, por edhe propagandistët që po helmojnë hapësirën publike brenda dhe jashtë vendit, tha presidentja e Komisionit Evropian, Ursula von den Leyen, në një konferencë të përbashkët për shtyp me presidentin ukrainas Volodymyr Zelensky dhe presidentin e Këshillit Evropian Charles Michel, raporton Ukrinform, përcjell Fol Drejt.
“Rusia duhet të paguajë për shkatërrimin e shkaktuar dhe gjakun e derdhur. Në ditët në vijim, ne do të propozojmë paketën e dhjetë të sanksioneve. Së pari, ne do të vendosim sanksione ndaj një numri liderësh politikë dhe ushtarakë. […] Por do të synojmë gjithashtu propagandistët e Putinit, sepse gënjeshtrat e tyre po helmojnë hapësirën publike në Rusi dhe jashtë saj. […] Ne do t’i ndjekim ata (ligjërisht)”, tha von der Leyen.
Ajo vuri në dukje se udhëheqja e institucioneve evropiane i ka dëgjuar shumë mirë mesazhet gjatë vizitës së tyre të fundit në Kiev, kur presidenti Zelensky insistoi në një hap të tillë.
Së dyti, paketa do të përfshijë një ndalim shtesë të eksporteve me vlerë më shumë se 10 miliardë euro. “Kjo do ta dëmtojë makinën ushtarake të Rusisë dhe do të vazhdojë të tronditë themelet e ekonomisë së saj”, tha ajo.
Raportet e mëparshme thanë se paketa e dhjetë e sanksioneve kundër Rusisë mund të miratohej përpara përvjetorit të parë të pushtimit të plotë të Ukrainës nga Rusia. /FolDrejt/
