Situata në veri vijon të jetë e tensionuar. Që nga vendosja e barrikadave nga strukturat kriminale serbe, dy pikat kufitare në Jarinje dhe Bërnjakë vazhdojnë të mbesin të bllokuara, shkruan Fol Drejt.
Për situatën atje ka folur së fundi edhe Ministri i Mbrojtjes i Serbisë Millosh Vuçeviq.
“Nuk ka pasur kontakte fizike mes dy palëve dhe asnjë sulm të ri ndaj komunitetit serb” – ka thënë ai ndër të tjera, por sipas tij, përkeqësimi i mëtejmë i situatës, duke e përfshirë këtu edhe një konfrontim të mundshëm, nuk përjashtohet.
“Për dymbëdhjetë ditë serbët kanë dalë në rrugë dhe disa ende flasin për pasojat e barrikadave, por nuk po merren me shkaqet dhe çfarë mundimi i detyroi ata të dalin në rrugë dhe të luftojnë për të drejtat dhe liritë e tyre të njeriut në mënyrë paqësore dhe demokratike.”
Njësoj si zyrtarët e tjerë serbë në Beograd, edhe ministri i mbrojtjes, pretendon se plani i Kryeministrit Kurti është që t’i dëbojë serbët nga “vatrat e tyre!”
Këto janë deklarata të rrezikshme, sepse tregojnë se Kurti nuk heq dorë nga terrorizimi i serbëve
“Ajo që tha mbrëmë Presidenti i Serbisë është se nuk duhet harruar se kemi një numër të madh të serbëve që jetojnë në jug të Ibrit në Graçanicë, Shtërpcë, të cilët nuk duhet t’i harrojmë. Dhe kur ke ambasadorin e një prej vendeve më të mëdha evropiane, siç është Gjermania, që thotë se barrikadat duhet të hiqen deri më 25 dhjetor, e para kësaj deklarata e Kurtit që e thotë të njëjtën gjë se ato duhet të hiqen, i bie se bëhet fjalë për një skenar i cili na çon në një përfundim: kaos!” – ka thënë ai.
Me një ton kërcënues ka paralajmëruar se “ushtria serbe është e dislokuar mirë”, dhe se ajo është e gatshme të ofrojë sigurinë e duhur për serbët. Tutje, ai ka zbuluar se qëllimi i Kurtit është që nga i tërë ky skenar, serbët të lodhen “dhe që në një moment të themi se nuk ka ku shkon më tutje dhe se duhet ta pranojmë realitetin.”
Por të gjitha këto pretendime janë hedhur poshtë nga Dushan Janjiq, kryetar i Forumit për Marrëdhënie Etnike, ndërsa ia ka kujtuar opinionit serb se shkaku kryesor i vendosjes së barrikadave në veri të Kosovës, është vetë politika zyrtare e Beogradit. Sipas tij, Vuçiq është vetë ai që po i “sponsorizon” barrikadat në veri, ndërsa qëllimin e ka – rikthimin e 1000 trupave sipas rezolutës 1244.
Megjithatë, sipas faktorëve ndërkombëtarë që veprojnë në Kosovë, por edhe një pjese të opinionit publik serb, kjo “ëndërr” e Vuçiqit, nuk mund të realizohet./FolDrejt/
